Igreja katólika husu líder polítiku sira tenke rekoñese sala

Igreja katólika husu ba lider polítiku sira ha Timor-Leste atu rekuñese sala, hodi fó liman ba malu atu solusiona impase polítiku iha rai laran.

Arce Bispu Metropolitanu Dioseze Díli, Dom Virgílio do Carmo da Silva SDB hatete, Igreja katólika hakarak lider polítiku sira tenki hanoin ida de’it ba povu no nasaun TL.

 “Ami hato’o ami-nia apresiasaun  bo’ot ba iha nai Prezidente, ba konfiansa ba iha uma kreda mai  atu rona, tanba haree iha loron hirak nia laran hatudu situasaun ne’ebé ita hakat ne’e, Prezidente hatudu nia aan nu’udar símbolu unidade, maske ita haree iha fatin  barak hanoin la hanesan, nai Prezidente koko atu garantia  nafatin nia nu’udar aman ba nasaun ida ne’e, sai hanesan símbolu unidade iha rai laran”, katak Dom Virgílio do Carmo da Silva SDB, Sesta (31/01/2020) ba Jornalista sira Iha Palásiu Prezidensial Nicolau Lobato.

Dom Virgílio akresenta, sira-nia prezensa iha diálogu la’os atu  fó ideia, maibé fó rekomendasaun nu’udar uma kreda Timor nian, desde husi funu uma kreda nia papel akompaña  povu ida ne’e nia susar no terus to’o mai ukun rasik aan.

“Depois ukun rasik aan, uma kreda nafatin fó ninia apoiu ba governu se deit ne’ebé bainhira ukun  rai ida ne’e, uma kreda prontu nafatin atu fó apoiu, atu ita nai ulun sira ukun rai  ida ne’e, uma kreda apoiu nai Prezidente nia poder tomak, ezerse ba naran katak, lori rai ida ne’e tuir nafatin ita-nia lei inan ne’ebé hatur ona  iha ita-nia konstituisaun, tanba konstituisaun mak dalan  bele garante atu la’o iha dalan ne’ebé los, tanba situasaun ne’ebé ita atravesa xavi mak ita-nia lei inan”, fundamenta Dom Virgílio.

Lider másimu Dioseze Díli ne’e salienta, ema hotu hatene katak, Timor Leste maioria katólika, inklui polítiku sira mós barak katóliku, uma kreda iha sentimentu ida, hakarak husu atu oinsa nai ulun no polítiku sira, maske diverzensia polítika nian ne’e,  maibé haka’as  aan tenke kaer liman hamutuk,  rekoñese la’o ona.

“Ita tenke brani atu hadia, brani rekopera buat ne’ebé lalos nian, atu ita bele kaer liman hamutuk la’o ba oin,  tanba ida deit mak ita hakarak, sarani ne’e dala barak ita ko’alia halo buat ruma ne’ebé la’o sala, maibé ita mós tenke iha mós forsa, atu simu buat ne’ebé la los ninian, aseita no hadia ita-nia aan, haree ba ita-nia povu lor-loron kontinua halerik, nai ulun sira hetan kadeira tanba povu sira mak lori ba hatúr iha kadeira ne’e, tanba tenke hakas aan nafatin oinsa  hakuak nafatin povu, iha situasaun inserteza husu ba polítiku sira hotu, atu kaer liman hamutuk harí nafatin unidade iha rai ida ne’e”, tenik Dom Virgílio.oly