Xefe Suku Kaikoli husu Governu halo manutenusaun ba valeta

Xefe Suku Kaikoli, Hipolito Margues, husu Governu  atu halo manutensaun ba valeta sira iha área Kaikoli, tanba tempu udan bee sae ba komunidade nia uma. 

Hipolito Marques hato’o preokupasaun ne’e, tanba tinan-tinan wainhira udan monurai, área Kaikoli sai sentru ba inundasaun, tanba valeta no drainajen iha área refere seidauk halo manutensaun,  nune’e bee la sai ba tasi no nalihun deit iha fatin.

“Durante ne’e banhira udan, Suku Kaikoli mak simu bee boot no foer sira iha foho ne’e tu’un mai bou hotu iha área Suku Kaikoli nian, área ne’eduni bainhira udan mai, Kaikoli mak sai vítima uluk ba inundasaun, tanba ne’e ha’u nu’udar Autoridade Lokal Suku Kaikoli nian, hato’o ona ba Ministériu Administrasaun Estatal atu halo rehabilitasaun ba valeta tolu, ida mak iha edifísiu Tribunal Rekursu nia oin, Sekretáriu Estadu Protesaun Civíl nian oin, no Ministériu Justisa nia oin, tanba sira ne’e iha área Kaikoli nian”, hateten Hipolito Marques ba GMN iha nia knar fatin Sede Suku Kaikoli Díli Tersa (25/02).

Hipolito Marques esklarese, durante ne’e membru Governu no membru Parlamentu sira seidauk tun ba área refere hodi haree kondisaun valeta no drainajen sira iha área Kaikoli nian

“Bainhira udan bo’ot mai nai ulun sira hanesan membru Governu no membru Parlamentu sira la mai, maibé bai-bain udan ema ne’ebé ho ami tama valeta laran mak maun bo’ot  Kay rala Xanana Gusmão ho komunidade sira iha área Kaikoli nian mak hamos foer sira, maibé governante sira ida lamai”, lamenta Hipolito.

Antes ne’e Primeiru Ministru Taur Matan Ruak bolu ona Vise Ministru Administrasaun Estatal, Abilio Caetano atu halo koordenasaun ho Xefe Suku sira iha Kapital Dili hodi identivika Drainajen no valeta sira husi foho hun tun to’o Tasi  atu nune’e governu bele halo manutensaun.aba

Leave a Reply

Your email address will not be published. Required fields are marked *