Implementa lei kódigu estrada, Polísia Tránzitu halo operasaun ba transporte sira

Ekipa konjunta husi polísia Unidade Tránzitu no Unidade Task Force munisípiu Díli, Kuarta (11-03-2020) hala’o operasaun ba transporte privadu no transporte públiku ne’ebé para la tuir estasionamentu no sinais tránzitu.

Komandante Polísia Tránzitu munisípiu Díli, Inspetúr Domingos Sarmento Gama, hateten, objetivu husi atividade ne’e atu implementa lei kódigu estrada, tanba utilizadór transporte sira dala barak sempre viola lei kódigu estrada ne’ebé iha.

“Lei kódigu estrada artigu 49 iha ne’ebá hateten, iha aliñea G ne’e dehan kareta ho motor sira ne’ebé mak komunidade sira uza labele para fali iha trotoar leten, razaun saída mak ita-nia Governu kria trotoar ne’e, tanba atu fó dalan ba ita-nia komunidade sira ne’ebé mak la’o ain atu ultrapasa iha trotoar leten, maibé iha realidade ita-nia komunidade sira la komprende, entaun kareta ho motor mak para fali iha la’o ain nia fatin, entaun la’o ain sira tun la’o fali iha estrada ne’ebé mak merese kareta ho motor mak liu, entaun bele hamosu dezastre”, Komandante Polísia Tránzitu munisípiu Díli ne’e, iha área estrada Palaçio do Governo.

Domingos afirma, antes ne’e Polísia Nasionál Timor Leste (PNTL), liu husi Unidade Tránzitu no autoridade relevante, hala’o ona sosializasaun ba komunidade no estudante sira.

Entretantu tuir planu, ekipa refere sei hala’o operasaun ba fatin públiku iha kapitál Díli, ne’ebé transporte sira para la tuir regra ne’ebé estabelese ona. san