Pesoal saneamentu 100 resin kontinua servisu iha Estadu Emerjénsia

Adjuntu Autoriedade Munisípiu Díli, Jeca Smith, deklara, pesoal saneamentu na’in 100 resin, kontinua  servisu rekolla lixu  iha kapital Díli, tanba  autoridade garante seguransa saúde pesoal sira  ne’ebé durante hala’o servisu iha situasaun Emerjénsia ne’e.

“Iha duni servisu instituisaun balun mak  limita tiha  funsionáriu sira, labele tama lai servisu durante situasaun Emerjénsia ne’e, maibé iha situasaun balun mós ita presiza fó atensaun, tanba Díli hanesan sidade kapital nasaun, ita kontinua nafatin servisu balun, dasa rai sira kontinua servisu, mas sira ita  fó ba stengah hari deit”, dehan Adjuntu Autoridade Munisípiu Díli, Jeca Smith ba Jornalista GMN Tersa (31/03/2020) iha nia kna’ar fatin Matadoru Díli.

Nia afirma, sira  mós iha orientasaun ne’ebé tenke fó ba pessoal sira tenke halo, hodi autodefeza ba pessoal sira-nia aan, husu para sira mós tenke asegura sira-nia aan ho maskara, luvas iha fatin servisu sira, tanba sira servisu saneamentu sira ne’e, la halo intereksaun diretamente, maibé kaer deit aisar para dasa.

“Tanba ne’e mak hein katak,  ho kondisaun sira ne’ebé mak bele asegura sira-nia saúde, por ezemplu uza maskara, luvas no sapatu, bele prevene hela sira-nia situasaun balun, maibé ita fó ba sira servisu meudia, depois sira bele fila ba deskansa, portantu pessoal saneamentu ne’ebé servisu  por volta 100 ida resin”,tenik Jeca.oly