KFP: Lei la obriga FP idade 60 reforma

Prezidente Komisaun Funsaun Públika (KFP), Faustino Cardoso, informa, Funsionáriu Públiku (FP) ne’ebé ho idade atinji ona 60 seidauk bele reforma, tanba lei númeru 12/2016 la autoriza no obriga FP hirak ne’e atu reforma.

“Lei númeru 12/2016 kona-bá seguransa sosiál seidauk iha aktu ida ne’ebé obriga funsionáriu sira ne’ebé atinji ona tinan 60 atu tama ba reforma, tanba ne’e atu tama ba reforma ka lae ne’e depende ba ema ida-idak nia rekerimentu, wainhira rekerimentu tama KFP prosesa no enkamiña ba Institutu Seguransa Sosiál (INS) atu bele prosesa seguransa sosiál ba benefisiáriu ida-idak ni’an”, Prezidente KFP ne’e iha Palaçio do Governo, Tersa (08/09/2020).

Faustino esplika, daudaun ne’e iha FP balun to’o ona idade 60, maibé seidauk prontu atu reforma no KFP labele obriga ema hirak ne’e atu reforma, tanba lei la obriga, nune’e depende ba ema ida-idak nia hakarak.

Bainhira halo ona alterasaun ba lei númeru 12/2016 ne’e bele reforma ona, maibé ne’e kompeténsia eskluziva Parlamentu Nasionál (PN).

 “KFP halo ona komunikasaun ho sira (PN-red) atu haree kestaun hirak ne’e, atu nune’e KFP bele koresponde ho situasaun demográfika populasionál Timor-Leste ne’ebé domina ho idade joven, duke ita iha KFP ne’ebé ho idade katuas no ferik, servisu mós ho matan dukur hela de’it”, tenik Prezidente KFP ne’e.

Entretantu tuir dadus ne’ebé KFP rejista iha fulan ikus ba tinan 2019 FP, inklui ajente administrasaun públika hamutuk 33,31 no husi númeru ne’e rihun 28 nu’udár funsionáriu permanente no sira seluk funsionáriu kontratadu nu’udár ajente administrasaun públika, númeru hirak ne’e la konta ho sira ne’ebé kazuál ne’ebé daudaun ne’e hamutuk rihun 6 resin.

Entantu dau-daun ne’e KFP nia forsa traballu kuaze rihun 40 resin. cin