Ema ta’a negosiante ida iha terminal Taibesse

Negosiante ida ho naran Jhon de Fátima, iha Kinta (15/10/20), ema ta’a iha terminál Taibesse. Ema sira ne’ebé ta’a Jhon ne’e ho kondisaun lanu hotu.

Kazu tentativa omisídiu ne’e akontese  mais ou menus tuku haat madrugada iha loos fatin terminál Taibesse, suku Lahane Oriéntal, postu administrátivu  Na’in Feto, munisípiu Díli.

Jhon de Fátima, haktuir kronolojia akontesimentu ne’e katak, nia fa’an  nasi kotak, derepente ema sira ne’e ou grupu ida mai ho kondisaun lanu hotu,  kaer sasán kro’at hodi ta’a kedas ba iha nia kaba’as parte karuk.

Hafoin akontese kazu refere, Polísia Eskuadra Na’in Feto, transporta vítima ba iha Hospital Nacional Guido Valadares (HNGV), hodi  suku vítima nia  isin-kanek ho pontu hitu.

“Ha’u nia kolega ida tuur hela, ema sira mai ho lanu mai diskute malu ho ami, ne’ebé ha’u husu ita boot sira lanu karik? depois ami dudu malu, ida hamri’ik iha kotuk ta’a derepente, depois ha’u duni fali nia, ha’u-nia ran mós sai maka’as loos, ha’u halai monu depois ema ne’e atu mai ta’a tan mak ha’u monu tiha de’it”, esplika vítima Jhon de Fátima ba GMN, iha ninia rezidensia Taibesse, Carega de Tiro.

Alende ne’e, Emelita Menezes, lamenta ho aktu krime ne’ebé mak ema halo ba nia katuas-oan. Tanba ne’e, Emelita husu PNTL atu kaptura suspeitu.

“Ha’u hakarak hato’o ba iha Polísia sira tenke kaer la-lais ema ne’ebé ta’a ha’u-nia laen ne’e”, dehan Emelita.

Iha akontesimentu ne’e, Polísia seidauk identifika suspeitu ruma, maibé Polísia Eskuadra Na’in Feto promete sei kaptura suspeitu.

Tuir lei númeru 5/2017, arma branka bandu ema kaer sasan kro’at, hodi hakanek no habadak ema seluk nia vida. avi