Projetu protesaun iha Praia dos Coqueiros halakon paizajen Díli

Reprezentante povu iha uma fukun Parlamentu Nasionál (PN), liu-liu bankada PLP ezije ba Governu atu halo intervensaun ba projetu protesaun satan laloran iha Praia dos Coqueiros, atu labele halakon paizajen kapitál Díli.

“Ha’u hakarak bolu atensaun ba projetu ida protesaun tasi-ninin iha Pantai Kelapa husi Embaixada Malaysia nian to’o otél Esplanada nia oin. Ha’u la hatene sé mak halo projetu ida ne’e, nia objetivu atu proteje ida ne’e sai estraga tiha paizajen Díli”, Deputadu bankada PLP, Abel Pires, liu husi ninia intervensaun iha PN, Tersa (13-10-2020).

Deputadu bankada PLP ne’e, esplika, antes ne’e tasi-ninin iha Praia dos Coqueiros sai fatin deskansa no populasaun hala’o atividade, maibé ho projetu taka rai-henek ho fatuk iha tasi-ninin, halo laiha posibilidade ba populasaun sira atu hala’o atividade, nune’e estraga mós Díli nia furak.

“Tuir loloos kompañia sira halo tuir hanesan iha edifísiu CAC nia oin, ho objetivu atu satan laloran, maibé nafatin fó espasu ba populasaun Díli atu halo atividade, ita labele halo projetu estraga Díli nia furak no hamate populasaun sira-nia atividade. Tanba ne’e Governu presiza halo intervensaun”, tenik Abel.

Hatán ba kestaun ne’e, Ministru Asuntu Parlamentár no Komunikasaun Sosiál (MAPKOMS), Francisco Jerónimo, promete sei hato’o ba  ministériu kompetente, hodi buka solusaun.

Entretantu antes ne’e, iha tasi-ninin Praia dos Coqueiros ne’e populasaun sira hala’o atividade desportiva, maibé ho projetu refere estraga paizajen Díli. ety