Selebra loron nasionál feto, GMPTL sei realiza atividade doasaun ran no feira

Grupo Mulher Parlamentar Timor-Leste (GMPTL) sei realiza atividade doasaun ran no feira iha ámbitu atu komemora loron nasionál Feto Timor-Leste, ne’ebé sei monu iha loron 3, fulan Novembru ne’e.

“Hanesan ita boot sira hatene iha loron 3, fulan Novembru ne’e loron nasionál feto, ita seidauk simu despaixu husi Konsellu Ministru (KM) relasiona ba komemorasaun loron feto nasionál GMPTL sei hala’o  atividade balun ne’ebé ami la hala’o iha loron 3. Iha loron nasionál feto ne’e ita sei realiza feira doasaun ran, tanba durante ita iha Timor liu-liu HNGV menus ran ba pasiente sira“, Prezidente GMPTL, Lídia Norberta ne’e ba jornalista sira iha Parlamentu Nasionál (PN), Kinta, semana ne’e.

Prezidente GMPTL ne’e subliña, kona-bá aktividade saída de’it mak sei hala’o iha selebrasaun ne’e nia parte seidauk adiante buat ruma, tanba sei planeia hela.

Entretantu atividade doasaun ran no feira ne’e sei hala’o iha resintu PN, iha loron 6, fulan Novembru ne’e no iha tinan 2020 ne’e Timor-Leste selebra loron nasionál feto ne’ebé monu iha loron 3, fulan Novembru ne’e ba dala 45. ety