Fundadór partidu APODETI termina peregrinasaun iha mundu

Fundadór Institutu Superiór Cristál (ISC) no mós partidu Asosiasaun Populár Demokrátika Timorense (APODETI),  Frederico Almeida Santos da Costa, termina ninia peregrinasaun iha mundu.

Matebian hakotu iis iha Hospital Nacional Guido Valadares (HNGV) Bidau-Díli, iha Sábadu (21/11), mais ou menus tuku 3 ho balun lorokraik, tanba sofre moras komplikasaun.

Tuir junta médiku nian katak, Fundadór APODETI ne’e, sofre moras grave hanesan tensaun, pulmaun no kakutak, nune’e ho esforsu doutór sira nian mós la konsege salva nia vida, hodi hakotu iis.

Alumni Dom Bosco ne’e, moris iha Díli, iha loron 1, Fulan Abríl, tinan 1930.

Matebian, Frederico Almeida Santos da Costa, mate ho idade 90, ho oan na’in 6, kompostu husi mane na’in 3 no feto 3.

Tuir informasaun husi família katak, serimónia funebre ba matebian, Frederico Almeida Santos da Costa, sei hahú ho selebrasaun misa requem iha igreja Balide no kontinua ba vizita eskola Institutu Superiór Cristal (ISC) Balide, depois kontinua ba halo’ot iha semitériu públiku Becusse-Díli. tos