Konsolida profesionál IT, ICT-TL realiza kongresu daruak

Asosiasaun Information Comunication and Technology Timor-Leste (ICT-TL) realiza kongresu ba daruak ho semináriu nasionál, hodi bele konsolida rekursu ba Information Technology (IT) iha Timor-Leste.

Prezidente asosiasaun profesionál ICT-TL, Abel Pires da Silva, informa, prezensa ICT-TL ne’e atu apoiu Governu iha prosesu dezenvolve teknolójia no informasaun.

“Hanesan ema profesionál IT iha Timor-Leste para oinsa mak konsolida la-lais rekursu iha Timor-Leste, primeiru mak dezafiu ne’ebé COVID-19 obriga mai ita liu-liu iha fulan Marsu liu ba tenke kumpre distánsia sosiál no seluk tan, entaun sira ne’e ezije teknolójia informasaun hodi fasilita no projetu Governu nian kona-bá dada kabu submarinu fibra ótika ba Austrália, entaun rua ne’e ezije tebes ICT iha Timor-Leste hodi fasilita iha setór hotu, nune’e presiza IT Timor”, Prezidente asosiasaun profesionál ICT-TL ne’e iha salaun Instituto Of Bussines (IOB), Fomentu-Díli, Kinta (05-11-2020), hafoin realiza kongresu ho tema “Konsolida Rekursu Hodi Konkretiza Papél Teknolójia Informasaun no Komunikasuan iha Dezenvolvimentu Nasionál”.

Tuir Ministru Transporte no Komunikasaun (MTK), José Agostinho da Silva, espera liu husi kongressu ne’e bele iha rezultadu ruma ne’ebé fó benefísiu ba ema hotu, liu-liu kontinua rekolla rekursu ne’ebé apoiu ba nasaun.

“Ho esperasansa katak kongresu no semináriu ida ne’e bele rezulta dokumentu importante ruma ne’ebé mak bele sai matadalan ba dezenvolvimentu setór komunikasaun liu-liu iha ICT-TL nian, ita hanesan nasaun joven ne’ebé foin hetan ukun rasik-an iha inísiu sékulu 21 ne’ebé mak buat hotu avansadu, siénsia no teknolójia ne’ebé avansadu iha tempu ne’e no mundu modernu iha globalizasaun, ita tenke adapta-an ho situasaun ne’e. Husu ba komunidade edukativu sira para oinsa mak fó edukasaun kualidade ba Timor-Oan, nune’e sira bele deskobre siénsia no kria kampu servisu no katak bainhira konklui eskola tenke kria buat ne’ebé inova no akomoda joven barak ba campo de trabalho”, tenik Governante ne’e.

Partisipa iha kongresu daruak ICT-TL ne’e, husi membru kuaze 500 resin ne’ebé servisu nu’udár profesionál teknolójia no informasaun iha setór hotu-hotu. ida