JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Tinan 28 kapturasaun komandante em chefe das FALINTIL Xanana Gusmão

Tinan 28 kapturasaun komandante em chefe das FALINTIL Xanana Gusmão

Loron 20, fulan Novembru, tinan 2020 ne’e nu’udár loron importante ida ba Timor-Leste, tanba iha loron 20, fulan Novembru, tinan 1992, militár Indonéziu kaptura komandante em Chefe das FALINTIL, Kay Rala Xanana Gusmão iha ninia subar fatin Lahane Osidental.

Xanana Gusmão inimigu sira kaptura iha Sesta (20/11/1992), mais ou menus tuku 6 dadersan, iha Abílio Araujo nia feton nia uma, Dona Aliansa de Araújo iha suku Lahane ho pistol no kilat boot M-16 ne’ebé se loos ba nia.

Kapturasaun Xanana Gusmão nian iha Díli ne’e hamosu reasaun maka’as husi líder FRETILIN nian, iha momentu ne’ebá Abílio Araujo, nune’e mós estudante barak iha rai-liur halo demonstrasaun hodi husu imediata atu liberta Xanana Gusmão.

Sekretáriu Ezekutivu CNRM-Frente Klandestina, Constâncio Pinto, hateten, momentu inimigu kaptura komandante em chefe das FALINTIL, Kay Rala Xanana Gusmão, halo ema hotu hakfodak.

“Ita-nia líder máximu rezisténsia ne’e mak Indonézia sira kaer ona. Em prinsípiu ita-nia populasaun tomak sente triste kona-bá akontesimentu ida ne’e”, Sekretáriu Ezekutivu CNRM-Frente Klandestina ba JNSemanário, Sesta (20/11/2020), iha Estúdio GMN TV, Bebora, Díli.

Constâncio Pinto, hateten, iha tempu ne’ebá (1992) nia asume kargu hanesan Sekretáriu Ezekutivu CNRM-Frente Klandestina, maibé nia sai tiha ba Portugál no to’o iha Lisboa iha loron 11, fulan Novembru, maibé antes nia sai ba rai-liur, nia hamutuk ho maun boot Xanana iha Díli.

Uma-nain Lakohi SEAK Dezenvole Xanana nia Fatin Subar iha Lahane

FOTO: GOOGLE

“Kona-bá kapturasaun ita-nia maun bo’ot Kay Rala Xanana Gusmão, altura ne’eba hanesan komandante em chefe das FALINTIL, klaru que akontesimentu ida que halo ema hotu hakfodak, tanba ita-nia líder máximu da rezisténsia ne’e mak Indonézia sira kaer ona. Em prinsípiu ita-nia populasaun tomak sente triste kona-bá akontesimentu ida ne’e. Ha’u altura ne’ebá asume kargu hanesan Sekretáriu Ezekutivu CNRM-Frente Klandestina. Maibé ha’u sai tiha ba iha liur. Ha’u altura ne’ebá to’o iha Lisboa iha dia 11 de Novembro, mas interesenta mak ne’e antes ha’u sai ne’e ha’u hamutuk hela ho ita-nia maun boot iha Díli. Bainhira ha’u sai husi Jakarta simu surat oan ida husi ita-nia maun boot duni, liu husi atuál Sekretáriu Estadu Protesaun Sivíl, Joaquim José Gusmão dos Reis Martins. Iha surat oan ne’e, nia hatete dehan, ita na’in rua neste momentu livre hotu husi serku inimigu nian, ne’ebé ha’u to’o iha Portugál ne’e ho konfiansa ida katak, ita-nia maun boot altura ne’e nia sai tiha ona, rekua tiha husi Díli ba ai-laran, ne’ebé bainhira ha’u to’o iha Portugál, ema hotu husu dehan oinsa kondisaun komandante em chefe das FALINTIL? Ne’ebé ha’u dehan, nia agora metin loos, bem protejidu no ha’u la hanoin kona-bá kapturasaun ne’e”, dehan Sekretáriu Ezekutivu CNRM-Frente Klandestina.

Tuir Constâncio, bainhira inimigu kaptura komandante em chefe das FALINTIL halo sira hotu sokadu. Maibé nafatin iha korajen hodi halo kampaña ba mundu atu Indonézia sira labele estraga maun boot Xanana.

“Iha loron 20 de Novembro ha’u ba hasoru doutora Suzana Diogo ne’ebé servisu hamutuk ho eis embaixadór Portugal mai Timor responsabel ba pasta Timor-Leste nian iha ministériu negésiu estranjeiru Portugál, sira husu saída mak akontese iha Díli, ha’u nono’ok de’it. Mai ha’u xoke boot ida, tanba líder máximu ema kaptura ona, iha momentu ne’ebá ita buka halo kampaña iha liur hodi proteje ita-nia komandante em chefe das FALINTIL ne’ebé iha inimigu nia liman. Iha dia seguinte ha’u ho maun boot Ramos Horta aranka kedan ba iha Portu hahú halo kampaña ba protesaun maun boot Xanana nian. Iha momentu ne’ebá ita luta diplomátika iha buat rua que halo dala ida de’it, ida mak libertasaun ba maun boot Xanana hamutuk ho prizioneiru polítiku sira no ida seluk mak halo kampaña ba masakre Santa Cruz nian. Iha momentu ne’ebá Xanana Gusmão nia profile boot teb-tebes iha mundu i presaun internasionál ba Indonézia mós maka’as teb-tebes, Portugál iha altura ne’e hakarak hatene kona-bá Xanana, haruka jornalista ida mai Timor, maibé uza fali pasaporte Noruega nian hodi tama mai Timor halo entrevista maun boot Xanana i lori imajen balun sai ba liur. Ami iha ne’ebá kampaña atu Indonézia labele estraga maun boot Xanana iha kadeia laran”, tenik nia.

“Kapturasaun ba maun boot Xanana iha momentu ne’ebá iha impaktu komesa dezmoralizadu, iha hanoin katak momentu ne’e inimigu oho Xanana mak sei mosu fali Xanana foun ida hodi hatutan. Buat ida mak ho prezensa maun Xanana iha kadeia ema hotu-hotu tau Timor-Leste iha mapa mundu i ema hotu ko’alia kona-bá Timor. Haree katak saudozu Nino Konis Santana prevé katak, kapturasaun nia komandante em chefe das FALINTIL ne’e hanesan inísiu da derrota da Indonesia. Altura ne’e Indonézia kaer nia oho kedan karik problema diferente ona. Mas sira kaer nia la oho, ita fó oportunidade ba nia hala’o polítika iha prizaun laran. Ita-nia saudozu mós haree ba esperiénsia iha Áfrika du Sul bainhira sira kaptura Nelson Mandela ba kastigu no fim Nelson Mandela duni mak liberta rai Áfrika du Sul husi apartheid nian. Hanesan komandante em chefe das FALINTIL ita nian ema kaer no halo polítika iha kadeia to’o ikus mai ita ba referendu. Iha altura ne’ebá maun boot Xanana hela iha Abílio Araujo nia feton (Aliansa de Araujo) nia uma. Iha reasaun solidariedade ba maun boot Xanana”, dehan Constâncio Pinto.

Julgamentu ba Xanana Gusmão ne’e hala’o iha Díli no Pengadilan Negeri Díli hamonu sentensa kadeia tinan 20, maibé tempu kastigu nian seidauk hotu, iha tinan 1999 Xanana Gusmão libre ona, tanba Timor-Leste ukun rasik-an ona liu husi Konsulta Popular 30 Agosto, ne’ebé organiza husi Organizasaun Nasões Unidas (ONU). GMN

Lee hotu :   Dom Vírgilio: Natal momentu atu apela valor importante ba malu

Add to Comments Here!!!!

error: Content is protected.
Secured By miniOrange
You might also like:
OJE 2021 GPM prevé tokon USD 10.4

Xefe Gabinete Primeiru Ministru (GPM), Azevedo...

ANPM halo promosaun virtuál dada investidór husi rai-liur

Autoridade Nasionál Petróleu no Minerál (ANPM)...

Identifika ema tama-sai ilegál, Odete: Sidadaun sira tenke keixa ba parte kompetente

Koordenadora Jerál Corona Virus Disease 2019...

Close