Populasaun prontu simu vasina

FOTO: Komunidade munisípiu Díli

Populasaun sira prontu simu vasina ne’ebé Governu, liu husi Ministériu Saúde (MS) sei implementa iha tinan ne’e.

Razaun sira hato’o prontidaun ne’e, tanba vasina iha benefísiu ba sira, nune’e Timor-Leste labele rejistu númeru mate ba COVID-19.

“Ida ne’e tenke tuir duni, ida ne’e komunidade ki’ik tenke ser rona orden Estadu nian ne’ebé fó tun mai, sim tenke prontu”, dehan komunidade, Tomas da Silva de Deus ba GMN iha Becora, Sábadu (30/01/2021).

Nune’e mós, komunidade Meguilita da Costa, hatutan, vasina ne’ebé sei implementa sira prontu tuir, tanba fó di’ak ba saúde ema nian.

“Prontu tuir, ba inan-aman sira tenke tuir oan sira ba eskola tenke tuir, para ita kuidadu ita nia-an atu nune’e moras ne’e labele da’et ba ita”, dehan Meguilita.

Nune’e mós komunidade, João Batista, hateten, vasina ne’ebé Ministériu Saúde (MS) sei implementa sira prontu koopera, tanba fó benefísiu ba saúde ema nian, nune’e Timor-Leste labele iha kazu mate.

“Vasina di’ak ba ita, buat hotu ita presiza kumpre, buat ne’ebé hatun husi Prezidente para ita bele la’o di’ak, komunidade bele la’o di’ak para labele akontese COVID-19 iha Timor-Leste, ida ne’e importante ba ita Timor-oan, presiza prevene para labele mosu mate iha Timor”, haktuir João.

Antes ne’e, iha Kinta, loron 21, fulan Janeiru, tinan ne’e, Xefe Governu, Taur Matan Ruak, deklara, nia parte prontu simu vasina ne’ebé MS sei implementa, tanba laiha dalan seluk, hodi kontra COVID-19 no husu ba Timor-oan hotu atu koopera ho Estadu, liu-liu MS ba vasina ne’ebé sei implementa.

Vasina ne’ebé Governu Timor-Leste sei uza mak AstraZeneca, ne’ebé devenvolve husi nasaun universidade Oxford-Inglaterra. ina