Stock foos iha Timor-Leste sei naton hela

Prezidente Centro Logístico Nacional (CLN), Augusto Junior Trindade, informa, maske foos iha armazen kompañia distributór menus, maibé laiha impaktu, tanba CLN garante stock foos hodi responde ba situasaun atuál Estadu Emerjénsia (EE).

Nia akresenta, ekipa CLN sei tun direta ba merkadu sira iha teritóriu Timor-Leste hodi haree no análize presu foos iha merkadu, oinsa halo atuasaun bainhira situasaun ne’e akontese iha terenu.

Tanba ne’e, Augusto, husu ba populasaun iha teritóriu tomak atu labele pániku ho informasaun ne’ebé espalla katak foos iha armazen empreza distributór no CLN la garante stock iha situasaun atuál.

“Ita iha hela foos, ita-nia foos mai hela COVID liu ba ita halo akizasaun ba 30 mill toneladas e 30 mill toneladas, ne’e foin mak ita distribuisaun mill ba protesaun sivíl mill ba MSSI no kuaze 28 mill sei nakonu iha armazen CLN baze ba ita-nia konsumu nasionál, ita-nia konsumu nasionál ne’ebé dadus mai mai husi Ministériu Agrikultura no Peska (MAP) bele garante katak ho 30 mill toneladas ne’ebé CLN iha ita bele garante katak ita iha hela reserva ba fulan 3 no to’o fulan 4, ne’e seidauk inklui setór privadu sira, tanba la presiza hamosu pániku iha komunidade nia leet, tanba Estadu rasik liu-liu iha CLN 30 mill toneladas no 30 mill toneladas ne’e halo tiha kálkulu ba ita-nia konsumu nasionál, ita bele hatete katak ba fulan 3 ate fulan 4 ita sufisiente hela bele responde”, Prezidente CLN ne’e ba GMN iha Armazen Tasi Tolu, Comoro-Díli, Kinta (07/01/2021).

Tuir dadus ne’ebé iha foos ho tonelada liu rihun 30 ne’ebé Governu sosa husi nasaun Vietname, sei iha tonelada rihun 20 resin.

Alende foos importasaun, dau-daun ne’e haree kulit iha armazen CLN hamutuk tonleada 900, husi númeru ne’e toneldade 400 dau-daun ne’e dulas hela.

Relasiona ho asuntu ne’e, GMN tenta halo konfirmasaun ho jestór empreza Lisun, maibé laiha fatin no jestora Perissos lakohi fó komentáriu. ina