Hamutuk ho feto, MCS hakotu iis iha otél

Abitante ida ho inisiál MCS hakotu nia peregrinasaun iha mundu (mate), tanba deskonfia konsumu ai-moruk, hodi toba hamutuk ho feto ida iha Otél Hudi-Laran, Kuarta (17/02/2021).

Tuir informasaun ne’ebé GMN asesu iha terrenu ou hosi Polísia katak, abitante MCS ho feto ida tama iha Otél Hudi-Laran iha meudia tuku 12:30 oras Timor-Leste, hafoin toba hamutuk ho feto ne’e no iha tuku 13:45 oras Timor-Leste derepente staff otél refere hakfodak haree matebian MCS latan hela iha semente leten, iha kuartu ida nia laran.

Tuir informasaun hosi seguransa pesoál Otél Hudi-Laran hateten, antes  ne’e  sira haree uluk feto ida sai hosi kuartu falun oin metin no la kleur sira haree odataman kuartu nakloke, nune’e sira hakbesik ba haree hetan abitante MCS latan hela iha rai.

No hafoin minutu balun nia laran Polísia Servisu Investigasaun Kriminál Nasionál no Eskuadra Dom Aleixo ho ekipa saúde to’o iha lokál de krime, hodi haree mate-isin refere.

Polísia Nasionál Servisu Investigasaun Kriminál (PNSIK) transporta kedas mate-isin ba iha mortuáriu Hospital Nacional Guido Valadares  (HNGV) ho carro funerário, hodi submete ba prosesu autópsia.

Matebian MCS moris iha  Bere Leo, postu administrátivu Lequidoe, munisípiu Aileu, iha loron 17, fulan Fevereiru, tinan 1977.

Iha lokál de krime, PNTL rekolla evidénsia motorizada Vixion kor mean ida, ne’ebé kondus hosi matebian hodi ba otél.

To’o ohin loron PNSIK seidauk identifika loloos feto ne’ebé ho matebian iha otél ou lokál de krime ne’e. avi