Xefe Estadu Maior Jerál FALINTIL, Forsa Defeza Timor-Leste (F-FDTL), Tenente Jenerál Falur Rate Laek, hatete, Ministériu Defeza (MD) sei loke prosesu rekrutamentu ba membru foun F-FDTL hamutuk 600 iha fulan-Agostu, tinan ne’e.
Nune’e komisaun ba prosesu rekrutamentu Forsa Armada foun halo hela preparasaun balun, no iha rekrutamentu iha faze tuir mai ne’e prioridade liu ba sidadaun Timor-oan hotu, liu-liu ba hirak ne’ebé antes ne’e submete ona dokumentu iha prosesu selesaun membru foun tinan 2021 nian.
Tenente Jenerál ne’e informa, sidadaun ne’ebé submete dokumentu iha tinan 2021 nian, hamutuk 2,400 no iha membru 70 mak apuradu kedas, maibé komisaun sei revé fila-fali.
“Komisaun ne’e hala’o ona no hili dadauk ona selesaun i liu ona sira uluk ne’e tanba Governu aprova ona Lei ne’ebé dekreta ona agostu ne’e tenke rekruta”
“Agora dadauk iha Kuartel komisaun sira hili ona, kritéria nafatin idade, nasionalidade Timor, labele tama arte marsiais, labele moras, labele tattoo ida ne’e nafatin,” dehan Xefe Estadu Maior Jerál F-FDTL, Tenente Jenerál Falur Rate Laek, iha Palásiu Prezidensiál, Bairo-Pité Díli, Segunda (16/05).
Iha tinan 2021, Ministériu Defeza liuhosi F-FDTL rekruta ona membru 600, no tinan 2022 sei rekruta tan membru foun 600.Ade
