Ekipa futeból Leão Fronteira sai kampiaun iha jogu GMN Cup ne’ebé realiza iha Kampo Dili Institute of Technology (DIT), Domingu (12/6/2022) ho marka penalidade.
Iha jogu ne’ebé hahú kuaze tuku 4 OTL ne’e, ekipa futeból GMN ho Leão Fronteira hatudu jogu ne’ebé atrativu hodi halo apoiante husi ekipa rua hakilar hodi fó motivasaun liu tan.
Nune’e liu minutu balun deit, ekipa GMN suta kantu husi jogadór Nivio Freitas ba grande área hodi rezulta liu golu, tanba laiha kabesada husi kolega jogadór GMN, nune’e rezulta 1-0.
Hafoin golu, ekipa Leão Fronteira hahú jogu ne’ebé ho tendénsia maka’as liu tan, hodi sempre halo amesa ba guarde rede GMN ninian, nune’e ikus mai ekipa Leão Fronteira liu husi sira-nia jogadór avansadu direta suta bola ba grande área no ikus mai sira “les” baliza GMN, nuneé skore muda ba 1-1. Hafoin skore 1-1, ekipa GMN hasa’e liu tan nia ritmu jogu hodi lansa sutus ba guarde rede Leão Fronteira, maibe laiha golu ida mak akontese tan, nune’e to’o árbitru hú apitu hodi termina jogu primeira parte.
Hafoin jogadór sira tun ba hemu bee, no kontinua tama fali ba jogu segunda parte ninian, ekipa rua halaó jogu neébé furak tebes, maibe laiha ida mak hatama tan golu, nune’e tama kedas ba suta pénalti tuir regulamentu neébé deside ona.
Iha suta pénalti ne’e, ekipa Leão Fronteira konsege manán ekipa GMN, tanba sutu neébé lansa husi jogadór Leão Fronteira kuaze tama hotu, no GMN nian la konsege tama balu, nune’e Leão Fronteira sai kampiaun iha jogu GMN Cup tinan 2022, no ekipa futeból GMN okupa iha segundu lugár.
Iha diskursu Prezidente Grupo Média Nacional (GMS) SA, Jorge Manuel de Araújo Serrano, fó apresiasaun no agradesimentu ba ekipa sira neébé hola parte hodi harame ona jogu Kopa GMN nian iha tinan ne’e. Tanba jogu ida ne’e hanesan oinsa atu kria amizade, fraternidade entre instituisaun sira hotu iha rai-laran. JND
