Troféu Kopa Mundiál sei to’o Timor-Leste (TL) iha Sábadu (11/6/2022) ne’e, no troféu refere sei lori hala’o vizita durante oras lima iha nasaun-laran hafoin ba nasaun Qatar nu’udar uma na’in ba kompetisaun Kopa Mundiál 2022.
Tuir oráriu, Troféu Kopa Mundiál sei to’o Timor-Leste iha tuku 11 dader oras Timor-Leste ne’ebé akompaña husi reprezentante FIFA (Federation Internationale De Football Association/lian França).
Alende ne’e akompaña mós husi jogadór lejendáriu França, Christian Lali Karembeu ne’ebé sei hatudu atrasaun iha Estádiu Munisipál Díli.
Troféu Kopa Mundiál ne’e sei to’o iha Aeroportu Internasionál Nicolau Lobato hafoin ne’e lori kedas ba Palásiu Prezidensiál Bairo-Pité no ikus liu tama ba Estádiu Munisipál Díli.
Dadaun ne’e, parte Federasaun Futeból Timor-Leste akompaña husi Sekretáriu Estadu Juventude no Desportu hala’o hela preparasaun máximu hodi simu Troféu Kopa Mundiál ne’e.
Troféu ne’e rasik komunidade bele asiste direta bainhira lori tama ona ba iha Estádiu Munisipál Díli, maibe ho distánsia dook, no úniku Prezidente Repúblika deit maka bele kaer no haree besik troféu ne’e.
Vizita husi Troféu Kopa Mundiál ne’e nu’udar vizita dahuluk no istóriku dezde Timor-Leste restaura hikas nia independénsia iha tinan 2002.
Timor-Leste nu’udar nasaun ikus ne’ebé simu vizita husi Troféu Kopa Mundiál molok fila hikas ba Qatar nu’udar uma na’in ba kompetisaun Kopa Mundiál 2022 ne’e, tanba antes ne’e vizita ona nasaun sira seluk.
Tuir ussoccer.com, FIFA harii iha dia 21 Maiu 1904, husi asosiasaun nasionál hitu hanesan, Belgika, Denmark, França, Belanda, España, Swedia no Sueçia. Ida ne’e ho objetivu atu promove jogu Asosiasaun Futeból hodi kria amizade, fraternidade entre asosiasaun nasionál, konfederasaun, no ofisiál no mos futebolista sira hodi promove organizasaun jogu futeból sira iha nivel hot-hotu, no mos atu bele kontrola tipu asosiasaun futeból sira ne’ebé konsidera nesesáriu.
FIFA moris tanba rezultadu husi jogu futeból internasionál sira ne’ebé aumenta ba bebeik hafoin inísiu seklu 20. Nune’e iha lideransa Robert Guerin, jornalista Franses ida ho membru fundadór na’in hitu hamutuk iha França sidade Paris forma futuru futeból ninian. Guerin, nu’udar prezidente primeiru FIFA, lidera organizasaun ne’e husi tinan 1904-1906, no membru na’in hitu seluk mos lori kargu prezidente FIFA, hanesan Jules Rimet durante tinan 33 husi tinan 1921 to’o 1954.
Oras ne’e dadauk, Gianni Infantino, ema Italianu ida mak lori kargu nu’udar prezidente FIFA liu husi Kongresu Estraordináriu 2016 ne’ebé hala’o hafoin akuzasaun ba líder bo’ot FIFA sira nune’e sai kauza ba eis prezidente Joseph "Sepp" Blatter rezigna-an.
Hanesan autoridade administrativa nível a’as iha futeból, FIFA jere aspetu jogu hotu, hanesan regula jogu la’o oinsa, haree transferénsia jogadór internasionál sira, realiza kompetisaun internasionál hanesan Kopa Mundiál FIFA, tau padraun ba árbitru sira, no mos regulamentu sira seluk tan.
Troféu Kopa Mundiál ne’e halo hodi osan-mean ne’ebé nu’udar prezente ida ba vensedór sira. Kopa Mundiál ne’e primeira vez hala’o iha tinan 1930, no iha ona troféu rua mak halo ona, hanesan Kopa Jules Rimet husi tinan 1930 to’o 1970, no Troféu Kopa Mundiál husi 1974 mak to’o hela agora dadauk ne’e. Nes
