Ekipa Boavista Timor hadok pontus husi ekipa Karketu Díli hafoin manan ekipa Ponta Leste ho skor 2-1.
Ekipa rua durante ne’e dunimalu pontus hodi sai kampiaun iha primeira divizaun Liga Futebol Amadora (LFA).
Iha primeira parte ekipa rua ne’e jogu ho tendénsia ne’ebé aas. Ekipa rua ne’ebé reforsa husi jogador estranjeiru halo presaun ba malu. Jogu foin tama iha minutu rua Boavista Timor hatama ona golu liu husi jogador Henrique da Cruz hodi halo skor 1-0.
Iha minutu 17 nia laran, ekipa Ponta Leste responde kedas ho golu ida, liu husi jogador estranjeiru Daniel Donkor hodi halo skor 1-1.
Antes termina primeira parte Danilson Araújo lori vitória provizóriu ba Boavista Timor ho golu ida tan, nune’e skor muda ba 2-1 to’o remata.
Tama ba segunda parte ekipa Ponta Leste halo mudansa no fó presaun maka’as ba área defeza ekipa Boavista Timor, maibé la fó rezulta golu. Ekipa Ponta Leste hetan oprtunidade liu husi penalidade tanba faillansu husi defeza Boavista Timor nian maibé penalidade ne’e la konsege rezulta golu to’o jogu remata.
Iha tabela klasifikasaun provizóriu, Boavista Timor liu pontus 4 husi Karketu Díli FC. Maibé oportunidade sei iha ba ekipa Karketu Díli FC hodi hakbesik pontus ho Boavista bainhira ekipa Karketu manan ekipa Atlétiko Ultramar iha jogu tuir mai.nes
