DELEGASAUN ANTL BA SEA GAMES HALO DESPEDIDA HO PR

Delegasaun Atleta Nasional Timor – Leste (ANTL) nebe partisipa iha jogu Sea Games, Sesta – feira nee halo despedida ho Prezidenti Repúblika (PR), Francisco Guterres ‘Lú-Olo’ iha palacio presidensial, Bairo Pite, Dili.

 Prezidenti Repúblika (PR) Francisco Guterres Lú-Olo senti orgullu ho grupu Atleta Nasionál Timor Leste (ANTL) ne’ebé lori Estadu Timor -Leste (TL) nia naran hodi partisipa iha jogu Sea Games. “Hau sente orguillu tanba Timor-Leste bele partisipa dala ida tan iha Sea Games, hodi tuir kompetisaun internasionál importante ida iha Rejiaun Sudeste Aziatiku nian,” informa PR Lú-Olo liu hosi nia intervensaun fó orientasaun ba atleta sira hodi aranka ba Malázia.

PR Lú- Olo hatutan, Timor – Leste hahu partisipa Sea Games iha tinan 2003 no lori ona medalla balu mai iha Timor -Leste hodi fó haksolok ba timoroan sira hotu tanba ne’e hatudu ba ema katak timor mós bele. “Ida ne’e hatudu katak ita mós iha kbi’it atu organiza an atu taru malu hodi manan rai sira ne’ebé mak ukun an kleur ona no iha rekursu bo’ot liu ita”dehan  Lú-Olo. Xefe Estadu nee, formasaun desportu nia signifika atu fó di’ak ba ema nia isin no mós ba ema nia própriu karakter, tan ne’e inisiativa desportu hosi entidade públiku ka privadu merese apoiu hosi Estadu.

Lider orgaun soberanu presidensial nee husu responsabilidade ba komisaun organizador, atleta nasionál no embaxador Timor – Leste nian iha rai liur atu haka’as an atu manan, maibé atu manan ne’e tenke hatudu atetude di’ak iha kompetisaun. “ Hau nia alin sira ba lori medalla mai maibé la hatudu komportamentu di’ak mós imi sei la hamorin Timor – Leste nia naran iha rai liur, maibé hau fiar ba alin sira sei fó orgullu nafatin katak ita bo’ot sira nia prezensa iha kompetisaun ne’e sei fó orgullu ba ita nia povu tomak,” dehan PR Lú-Olo. Iha fatin hanesan Sekretáriu Estadu Juventude no Desportu (SEJD) Leovijildo Hornai hatete, parte hosi governu hamutuk CDTL no Komite Olinpiku Nasionál no atleta sira atu ba tuir jogu Sea Games iha Malázia hasoru Prezidenti Repúblika hodi simu orientasaun hosi Prezidenti Repúblika atu ba kompete iha kompetisaun refere.

“Ohin (Horseik) ita mai ofisialmente husik ita nia atleta sira iha Palacio Prezidensiál tanba ita hatene katak atleta sira ne’e reprezenta Estadu no bandeira Timor – Leste tanba ne’e mak Prezidenti Repúblika mak ohin husik hodi bele hetan liu tan espiritu forte liu tan,” nia afirma.

Partisipasaun Timor – Leste nian ba jogus Sea Games tinan nee delega atleta 65 mai husi modalidade 9. Modalidade atletizmu, Taekwondo, Voleiból,  Karate, Silat, Boxi, Natasaun, Futeból. Ba ekipa modalidade Futeból nian aranka iha Sabado (12/8) semana nee, kontijente sira seluk sei tuir. Sis