CDTL-CONTL aktualiza preparasaun Asean Games 2018 ba SEDPAC

Confederação Desporto Timor-Leste (CDTL) ho Comitê Olímpico Nacionál Timor-Leste (CONTL) aktualiza Preparasaun Asean Games 2018 ba Sekretariu Estadu Desportu no Promosaun Alta Competisaun.

Aktualiza preparasaun atleta sira nian ba Asean Games 2018 nee aprezenta husi Prezidente CDTL, Afranio Xavier Amaral ho vice Prezidente CONTL, Mateus Da Cruz De Carvalho iha reuniaun ne’ebé hala’o iha edifisiu SEDPAC Sional, Lecidere-Díli, Tersa (20/03/2018).

Prezidente CDTL, Afranio Xavier Amaral informa, nia parte alerta ona ba Federasaun sira hodi selesiona no identifika didiak atletas nunee bele reprezenta duni Timor-Leste iha eventu internasional ne’e.

Nia hatutan proposta orsamentu haruka ona ba SEDPAC, governu aprova ona sei entrega ba Comitê Olimpico atu bele halo ona deslokasaun atletas sira nee ba tuir kompetisaun nebe sei halao iha Indonesia.

Nune’e mos Vise Prezidente Comite Olimpico Nacional Timor-Leste Mateus da Cruz de Carvalho hateten, nia parte kontinua hein lista atletas husi CDTL nune’e bele haree atu haruka ba komisaun Organizadora eventu Asean Games iha Palembang, Indonesia.

“Ita sei hein hela selesaun husi CDTL rasik halo ba preparasaun, tanba entry by sport ne’ebé mak antes ne’e haruka ba, hamutuk federasaun 13, maibe hafoin try out, rezulta deit federasaun 12 mak sei partisipa iha eventu Asean Games ne’e, sei kontinua hein atletas fixu husi CDTL mak ami bele halo enty by number ne’e sei to’o iha fulan Juño oin mai,” esplika Vice Prezidente Comite Olimpico Nacional Timor-Leste .

Sekretariu Estadu Desportu no Promosaun Alta Competisaun Osorio Florindo husu nafatin federasaun no modalidade desportu hotu atu prepara diak liu, molok partisipa iha eventu Asean Games.

“Agora besik ona eventu Asean Games tinan ne’e fulan Agostu iha Indonesia, ami husu sira, atu halo preparasaun diak liu,  entermus de orsamentu limitadu, maibe ne’e la signifika osan la iha, osan iha oituan e hau husu federasaun sira atu hatama planu mensal molok to’o fulan Agostu atleta sira desloka ba liur,” dehan SEDPAC, Osorio Florindo.

Eventu Asean Games sei realiza iha Palembang Indonezia fulan Agostu tinan ne’e, ne’ebé sei envolve modalidade desportu oioin husi nasaun sira iha kontinente Azia hamutuk nasaun haat nolu resin lima (45) inklui Timor-Leste. Enkuantu Timor-Leste sei lori modalidade sanulu resin rua (12) ho atletas 60 resin. Ito