FMCTL komemora aniversariu PNTL ho eventu Motocross

Federação Motorciclismo Timor-Leste (FMCTL) organiza eventu  Motocross hodi Komemora Aniversariu Policia Nacional Timor-Leste (PNTL) ba Dala-18.

Eventu Motocross ne’e hala’o iha Tasi Tolu, área Pelican Paradise envolve crosser Timoroan 100 resin nebe fahe ba kategoria senior no junior ho klase oi-oin.

Sekretariu Estadu Desportu no Promosaun Alta Competisaun (SEDPAC), Osorio Florindo  ne’ebé marka prezensa iha abertura ne’e hato’o parabens ba inisiativa tomak husi FMCTL.

“Governu apoiu federasaun hotu-hotu, e li-liu federasaun ne’ebé mak iha kreatividade hodi hala’o eventu, iha kontekstu kompetisaun nafatin. Governu iha difikuldade orsamentu maibe ita bele halo jestaun tanba ne’e tinan ne’e ita tau osan ba federasaun motorcisclismo atu hala’o eventu hodi anima povu tomak,” hateten Sekretariu Estadu, Osorio Florindo.

Iha fatin hanesan Prezidente FMCTL, Longinhos Monteiro  promoete sei kontinua kria eventu barak liu ba Crosser timoroan sira iha futuru.

“Ami kontinua enkoraza talentu crosser husi klube hotu-hotu, tanba ne’e hau hanoin federasaun sei kontinua organiza eventu ba crosser sira iha futuru mai,” dehan Prezidente FMCTL, Longuinhos Monteiro.

Eventu ne’e hala’o durante loron rua husi loron 24 to’o 25 fulan Marsu antes selebrasaun aniversariu PNTL ba dala-18 sei monu iha loron 27 fulan Marsu, aban. Ito