Eladio Rojas : “Ha’u rekuiñese no louva tebes forsa husi ekipa Atl. Ultramar”

Treinador Clube Boavista Timor ,Eladio Rojas, hateten nia rekuiñese no louva tebes forsa husi ekipa jogadores Atletico Ultramar hanesan adversariu jogu jornada dalima primeira divizaun Liga futebol Amadora époka 2018.

Eladio Rojas kontente tanba bele hadau ona pontu tolu husi Atletico Ultramar núdar klube ne’ebé forte.

Eladio Rojas fo sai lia hirak ne’e liu husi konferensia imprensa ne’ebé hala’o iha sede LFA Xanana Sport Centre Bairu Dos Grilhos-Díli, Kinta (17/05).

“Hau kontente tebes, bele manan ona adversariu Ultramar hanesan núdar klube ida forte tebes ne’ebé susar atu halakon sira, e kontente liu bele hetan pontu tolu (3) iha loron ne’e (kinta-feira-Reed), e hau rekuiñese  no louva tebes ekipa adversariu nudar klubu ne’ebé forte tebes,” hateten treinador Boavista Timor FC, Eladio Rojas.

Iha fatin hanesan treinador Atletico Ultramar Gaspar Quintão rekuiñese derota kontra Boavista FC  tanba failansu husi liña defeza.

“Iha jogu primeira parte nian, ami iha failansu iha liña kotuk (defeza-Red), ne’e mak iha minutu dahuluk nian konsege oportunidade ba Boavista marka golu. Tanba ne’e ba jogu tuir mai ami sei tenta melhora failansu hirak ne’e inklui unidade jogu ekipa nian, liliu koordenasaun liña oin ho liña klaran ne4’ebé tenke melhora,” hateten treinador Atletico Ultramar, Gaspar Quintão.

Entertantu Kapitaun ekipa Atletico Ultramar Glaco Trajano triste no rekuñese failansu iha liña defeza.

“Hau triste oituan tanba ami ekipa ne’ebé diak no preparadu ona hodi kontra sira (Boavista Timor FC), maibe realidade mak nune’e, ami tenke simu derota, en taun ami sei kontinua melhora failansu iha kampu mak parte defeza nian,” dehan kapitaun ekipa Atletico Ultramar, Glaco Trajano.

Ekipa Boavista Timor provizoriamente okupa possisaun dahuluk iha tabela Klasifikasaun Primeira Divizaun Liga Futebol Amadora Ho Pontu 12 hafoin kompleta nia jogu lima.

Enkuantu ekipa Atletico Ultramar okupa iha pozisaun dalima ho pontu lima hafoin kompleta nia lima. Ito