TL sai uma na’in ba jogu CPLP, KM aprova orsamentu rihun USD 511.250

Ministra Edukasaun Juventude no Desportu (MEJD), Dulce de Jesus Soares, hateten, Konsellu Ministru (KM) aprova, orsamentu rihun USD 511.250, ba organizasaun konferensia ministrus joventude no desportu no mós jogus Komunidade Pais ho Lingua Portugues (CPLP) ba dala -12. 

Timor – Leste (TL), sai uma nain ba jogu CPLP ne’ebe sei realiza iha 14 to’o 24 Jullu 2020 no konfirmadu TL sei hatun modalidade 8.

“Preparasaun ba organizasaun konferensia ministrus joventude no desportu no mós jogus CPLP ba dala sanulu resin rua, ohin KM aprova orsamentu ba faze preparasaun, por volta mill USD 511.250, hodi kontinua halo infra-estutura, ne’ebé sei iha prosesu, no mós preparasaun ba atleta sira  nune’e mos prepara grupu ne’ebé harame eventu ne’e iha abertura no enseramentu”, hateten, Ministra Edukasaun Juventude no Desportu, Dulce de Jesus Soares iha Palaçio Governu, Kuarta (12/02/2020)

Dulce subliña, jogu CPLP sei hahu iha loron 12 fulan Jullu tinan ida ne’e, durante loron 10 nia laran, uma nain sei partisipa iha modalidade hotu no atleta Timor-oan ne’ebé sei partisipa hamutuk 92.

Nune’e mós, nasaun 4 mak sei partisipa kompletu ba modalidade hotu ne’ebé hala’o iha jogu CPLP, Timor-Leste, Portugal, Brazil no São Tome Prinsipe, no agora rejista ona atleta 500 mak sei mai.

Maibé, la inklui ho delegasaun sira, maibé ema besik 700 mak sei mai partisipa jogu desportivu CPLP, no konferensia dos ministrus CPLP iha fulan Jullu nia laran.

“Vantazen husi jogu ne’e bo’ot tebes, tamba ne’e primeira vez depois de Timor ukun rasik  aan, ita sai uma nain ba jogu internasionál, ne’e oportunidade ida atu promove ita nia nasaun ba nasaun CPLP, nune’e mós iha rejiaun ne’e hotu katak, TL mós iha kapasidade atu bele organiza jogu internasionál, ema barak sei mai haree ita nia kultura no saida mak ita iha, aumesmu tempo promove mos buat ne’ebé mak ita iha, eventu ida ne’e  fó mós oportunidade ba ita nia oan sira ne’ebé mak hatene koalia portugues, envolve hanesan voluntariu hodi apoiu delegasaun  hodi vizita fatin istorikú no turismu iha TL”, haktuir, Dulce de Jesus.

Governante ne’e haktuir, Ministeriu Negosio Estranjeitu no Kooperasaun (MNEK), hala’o hela kontaktu ho nasaun Guine Equatorial, atu nune’e bele partisipa iha jogu desportiva refere.Cin