Aviaun Aero Díli monu tanba ventuiña nakdoko

Aviaun  Komersiál Kompañia Aero Díli ho marka 4W-AAA monu iha área Pelila,  Suku Lauhata,  Postu administrativu Bazartete, Munisípiu Liquiça, tanba impaktu husi ventuiña nakdoko maka’as.

Aviaun ne’e monu   Kuarta (20/02/19) mais ou menus tuku 9 dadersan oras Timor-Leste.

Pilotu Hugo Mariano das Neves, haktuir,  kronolojia husi akontesimentu katak,   iha dadersan  sei tula pasajeiru nain haat  sai husi Díli ba Suai,  aviaun nia kondisaun diak hela, maibe wainhira  nia fila husi Suai tula pasajeiru ida, waihira viajen sei diak hela maibe to’o iha Liquiça aviaun nia ventuiña nakdoko maka’as.

Ho situasaun ne’e,  nia konsege kontaktu mai iha AERO Díli atu  desidi fila ba Maliana,  maibe  tanba do’ok  liu, nune’e pilotu disidi aviaun semo  badak  monu tun  ba rai iha área Lauhata Taman Makam Pahlawan. Iha akontesimentu ne’e rezulta  aviaun nia liras parte karuk   tohar  no roda naksobu.

Enkuantu pilotu ho pasajeiru kondisaun diak, maibe pasajeiru senti trauma evakua  ba iha Hospital Munisipal Liquiça hodi halo check up ba ninia saúde.

“Ha’u ba to’o Suai laiha problema ida, depois fila-fali husi Suai mós normal hela, atu tama Liquiça mak ventuiña nakdoko  hodi disidi tun de’it ona”, Hugo Mariano das Neves, ba jornalista sira iha área Pelila  Suku Lauhata Munisípiu Liquiça.

Alende sasin Daniel dos Santos nu’udar Xefe Suku Lauhata haktuir, nia haree rasik, akontesimentu ne’e, tanba antes  aviaun ne’e monu semo badak  atu soke riin eletrisidade sede Suku Lauhata,  No halo ema barak pániku  halai sai iha estrada ibun hodi hateke tuir aviaun ne’e  no   Daniel dos Santos  foti ninia  motor hodi duni tuir kedas aviaun ne’e kuaze distansia kuaze 15 kilometru aviaun monu tun ba rai ona.

Alende ne’e Komandante PNTL Munisípiu Liquiça Superintendente  Olavio Cristovão  akresenta  katak, iha akontesimentu ne’e la rejista vítima ruma kanek,  maibe rejista  mak  motorista nain rua  kanek kaman tanba  aviaun  monu ba rai  akompaña ho anin halo  vítima nain rua monu ba rai hodi evakua kedas ba halo tratamentu iha Hospital Munisipal Liquiça vila.

“Ami  PNTL Liquiça  prontu garante seguransa ba evidensia  hanesan aviaun ne’e, hodi submete ba  prosesu investigasaun, maibe ba dadauk  Polisía dada haleu ona Police line, atu ema labele ba book arbiru”,hatete Olavio Cristovão.

Hafoin akontesimentu ne’e  ekipa aviasaun sivil to’o kedas iha fatin akontesimentu  foti  ona black box hodi submete ba prosesu investigasaun.avi