Ekipa tékniku husi Korea vizita GMN TV

Ekipa observadór tékniku husi Korea do Sul, hala’o vízita mai edifísiu televizaun GMN, ho objetivu hodi haree besik liutan ekipamentu sira iha estasaun televizaun privada ne’e.

Durante iha vizita ne’e, ekipa tékniku sira mós hala’o enkontru ho responsável másimu GMN nian.

Diretór Informasaun, Fransedes Suni, hateten, vizita ekipa ida husi Korea ne’e, ko’alia kona bá oinsa atu estabelese kooperasaun ho média sira, liu husi komunikasaun atu oinsa bele dezenvolve área edukasaun ho di’ak liu.

“Ekipa levantamentu ida husi Korea ne’e, mai iha posibilidade atu avalia atu halo kooperasaun, oinsa atu halo koperasaun ida ho média sira, liu husi komunikasaun, atu oinsa bele dezenvolve área edukasaun ho di’ak liu, husi programasaun GMN nian, no ekipa observador sira mós haree ekipamentu Televizaun GMN nian ne’ebé iha”, hateten Fransedes Suni ba GMN iha nia knaar fatin Bebora Díli, Kinta (16/01).

Nia haktuir, ekipa ne’e hasoru malu ho responsavel GMN TV atu oinsa bele halo kooperasaun di’ak, nune’e bele realiza programa ne’e iha tempu tuir mai, tanba sei iha kontinuidade atu kontaktu  malu ho ekipa ne’e.

Koordenador ekipa observadór Korea, Jeong Baek, senti orgullu ho ekipamentu ne’ebé iha GMN, no promete sei fó apoiu  ba média liu husi peskiza iha área edukasaun iha Timor-Leste.

 “Ha’u husi Korea, no ha’u espertu iha área emissaun (broadcasting televizaun) nian, ha’u nia área espeliazada iha área emisaun edukasaun nian. Ha’u haree imi nia fasilidade diak tebes, Ha’u esperiensia nasaun barak investe iha broadcasting edukasaun nian, maibé ha’u haree imi nia fasilidade avasandu tebes, no ha’u haree ida ne’e mak diak liu ona, maibé imi presiza buat hirak sira hanesan rekursu humanu, estudu ba rekursu humanu nian, ha’u haree ida ne’e impresivu menarik tebes”, hateten Jeong.

 “Ami-nia ekipa atu suporta imi-nia nasaun, ne’ebé nu’udar nasaun dezenvolvidu, tanba nasaun dezenvolvidu sira iha problema sira mak hanesan iha área edukasaun. Ne’eduni, sistema broadcasting/emissaun edukasaun nian ne’e iha vantajen tebes, iha ne’ebé ha’u sei foti nia rezultadu husi ami-nia investigasaun/peskiza, iha ne’ebé rezultadu ne’e nu’udar buat ne’ebé diak tebes ba imi-nia nasaun, hodi bele hadia imi-nia nasaun nia sistema edukasaun”, katak Jeong

Ekipa survey husi Korea ne’e, sei kontinua halo komunikasaun ba prosesu kooperasaun ne’e ho média sira iha Timor-Leste.aba