Juri INDOSIAR sei taes artista TL tuir Akademia Dangdut Asia

Juri husi televizaun INDOSIAR Indonesia, Linda Wibisono ho produser Ekin Gabriel Surbakty,  ohin Sesta (19/816), to’o iha Dili, Timor-Leste (TL), nune’e aban Sabadu (20/08) serbisu hamutuk ho televizaun  ETO  hodi halo audisaun final ba artista Timor oan sira  ne’ebé sei reprezenta Timor-Leste ba partisipa iha eventu  Akademia Dangdut Asia daruak ne’ebé mak sei hala’o iha Jakarta Indonesia.

Eventu refere sei hala’o iha loron 23 fulan Outubru to’o  fulan Dezembru nia laran tinan ne’e. Eventu ne’e sei hala’o episodiu hamutuk nen nulu (60) no konkorentes sira husi nasaun nen (6), Indonesia, Singapore, Malaysia, Brunei Darusalam, Thailandia ho Timor-Leste.

Tuir produser INDOSIAR, Ekin Gabriel Surbakty ba jornalista sira liu husi konferensia ba imprensa,  iha edifisiu TV-ETO Mais Hudilaran, Dili, Kinta (18/08),  hatete, durante ne’e sira halo hotu ona audisaun ba artista sira husi Indonesia, Brunie Darusalam, Singapore, Malaysia Thailandia ne’ebé mak sei tuir hotu kompetisaun Akademia Dangdut Asia daruak  ne’e. no ikus liu mak Timor-Leste ne’ebé maka sei hala’o audisaun iha Timor Plaza hahú husi tuku 10 dader OTL to’o remata.

“Audisaun Sabadu agora ne’e  hotu, depois ami fila ba no sei fo sai rezultadu husi audisi ne’e iha semana oin. No husi artista nain 19 ne’ebé mak liu audisi ne’e sei hili nain 5 mak reprezenta Timor-Leste ba iha eventu ne’e,”hatete Produser INDOSIAR Ekin Gabriel Surbakty. Ekin Gabriel Surbakty hatete, eventu Akademia Dangdut Asia ne’ebé sei hala’o iha Jakarta, Indonesia ne’e alen kompetisaun ba muzika dangdut nian, parte ida atu kria relasaun amizade entre nasaun sira husi Asia nian.

“Ida ne’e iha parte ida atu promove mos  nasaun ida-idak nia kultura, tridasun sira. Ho ne’e eventu ida ne’e mos  bele halo ita hamutuk,” Nia hatete.

Nia dehan, eventu dangdut akademia Asia ne’e, muzika ne’ebé artista sira atu kanta tenki ho lian Indonesia ho ritmu dangdut. Maibe la taka dalan mos karik husi artista  sira nain 5 seluk hanesan Singapore, Malaysia, Brunei Darusalam, Thailandia ho Timor-Leste bele kanta muzika dangdut ho lian lokal nasaun ida-idak nian.

Iha eventu ne’e alen de artista sira, husi INDOSIAR mos sei konvida komentador husi nasaun ida-idak ne’ebé mak sei reprezenta ida-idak ninia nasaun ho juri ida kada nasaun  ida-idak  hamutuk ho juri husi INDOSIAR hodi  halo penilaian ba artista sira ne’e.

Iha oportunidade ne’e, juri Linda Wibisono, hatete,  tuir nia akompañamentu no  rona informasaun husi Manajer  ETO-TV Mais nian katak artista Timor oan hamutuk nain 19 maka liu ona husi pra audisi, agora sira komesa treinu maka’as hela ba kanta  no treinu fizika ninian.

“Tuir ami ida ne’e importante tebes tanba atu tuir kompetisaun ne’e importante  husi  juri sira nian haree no  atu fo valor primeiru haree liu ba lian, tuir fali  penampilan  wainhira sira kanta iha palku no fiziku,”Linda hatete.

Iha konferensia ba imprensa ne’e, Produser no juri INDOSIAR  Indonesia ne’e akompanha husi  Manajer ETO Mais, Edmundo Freitas.Des