Konkorentes 10 liu pra-audisi Akademi Asia Dangdut

Konkorentes sanulu (10), kompostu husi feto hat (4) no mane nen (6) liu ona husi pra-audisi primeiru ba eventu Akademi ASIA Dangdut  ba dala rua (II) ninian.

Halo primeiru pra-audisi, Domingu (24/07), iha edifisiu ETO Telco Hudi laran, Dili.

Rreprezentante ekipa juri Didinho Marcal ba jornalista sira Segunda (25/07), hatete, atu fo hatene ba publiku, iha juventude ne’ebe interese hakarak tuir Akademi ASIA Dandut ba dala rua, hamutuk 17 maka mai tuir pra-audisi. Entre numeru ne’e,  nain hitu (7) mak la liu, maibe restu liu hotu kedas.

“Sira ne’ebe liu, ami so haree deit kualidade kanta, kontrola emosaun iha palku oin, hatudu performance ne’ebe diak iha palku leten, unsur vocal ne’ebe halai ba dangdut uitoan nune’e maluk sira husi Indosiar bele kelola sira nia vocal hodi sai dangdut no sira ne’ebe la liu iha pra-audisi ne’e ami haree ba  kualidade vocal, performance emosaun iha palku leten ladun estandar hanesan sira nia kolega ne’ebe mak liu,”hatete Didinho.

“Ha’u nia esperansa katak iha pra audisi dala rua no ikus mai iha  audisi final ne’e  sei taes artista Timor oan nain lima (5) ne’ebe iha kualidade hodi reprezenta Timor-Leste ba iha eventu internasional Akademi ASIA Dangdut ba dala rua ne’ebe sei hala’o iha Jakarta Indonesia fulan Outubru tinan ida ne’e,”Nia hatete.

Iha oportunidade ne’e, David C. Gusmão, hanesan kantador ne’ebe liu husi pra audisi ne’e hatete, hanesan artista senti kontenti tebes maske hanesan buat foun ida, maibe bele hetan oportunidade liu husi audisi hodi halo preparasaun ba eventu Akademi ASIA Dangdut.

“Ha’u nia esperansa ba oin sei hadia no prepara an diak liu tan atu nune’e bele lori nasaun Timor-Leste nia naran hodi ba partisipa no kompete iha eventu  Akademi ASIA Dangdut  ba dala rua (2) ne’e,” Nia hatete.

Ba eventu ne’e rasik, Televizaun Indosiar Indonesia sei halo parseria ho Televizaun ETO Telco Timor-Leste  hodi halo preparasaun ba pra-audisi no audisi final hodi hili artista Timor oan nain lima (5), reprezenta Timor-Leste hodi ba tuir kompetisaun akademia  muzika dangdut  ASIA ne’ebe maka sei hala’o iha Indonesia.Des