Corona Virus Disease 2019 (COVID-19) ne’ebé mosu iha sidade Wuhan provinsia Hubei Xina, no oras ne’e espalla ona ba Nasaun balun hodi hamate ema atus resin no ema ne’ebé infetadu besik rihun 12, nune’e obriga Nasaun balun labele simu pasajeiru hosi sidadaun Xineza sira maibé iha Timor-Leste Citilink Airline no Sriwijaya Air, seidauk simu orientasaun ruma hosi Governu atu labele simu pasajeiru sidadaun Xines sira mai Timor.\
Reprezentante Aviaun Citilink, Fernando da Silva, hatete, to’o oras ne’e Citilink Airline seidauk simu karta ofisiál no orientasaun ruma hosi Ministériu relavente sira, atu labele simu pasajeiru sidadaun Xinezes ne’ebé atu mai Timor-Leste.
“Iha semana 2 liu ba ami simu ona formulario husi Ministériu Saude (MS) hodi fahe ba pasajeiru sira ne’ebé mai hosi Estranjeiru.Hau atu informa Citilink Airline presiza karta hosi Ministériu relevante konaba, bainhira halo cheking hetan pasajeiru Xina labele simu”, dehan Reprezentante Aviaun Citilink, Fernando da Silva, ba JN-Diário Segunda (03/02/2020) iha Timor-Plaza Díli.
Reprezentante Aviaun Citilink informa, to’o oras ne’e Citilink simu ona orientasaun hosi parte Komandante Imigrasaun Aeroportu maibé laos hosi karta ofisiál hodi hatete, hahu hosi loron no fulan ida ne’e labele simu ona pasajeiru hosi Xina, maibé karik simu tenke iha karta medíku ruma ne’ebé hatete, pasajeiru sira ne’e la identifika virus corona.
“Ami sente ida ne’e la justo tanba orientasaun ne’e laos hosi karta maibé liu hosi via telephone no media sosiál whatsap. Karik diak liu mak tenke liu hosi karta ofisiál nune’e bainhira mai halo cheking iha Denpasar tenke bazea ba karta, tanba sei laiha karta depois ami labele simu pasajeiru hosi Xina ikus ema kritika, ami sente ida ne’e diskriminasaun,” dehan Fernando da Silva.
Nia hatete, iha semana ida liu ba ami simu pasajeiru hosi Xina ne’ebé atu mai Timor, tanba sira iha karta mediku, inklui estudante Timor oan sira ne’ebé eskola iha Xina hamutuk 3.
Iha fatin hanesan, Branch Manager Sriwijaya Air, Dirham Wahyudi hatete, iha sabadu foin lalais iha pasajeiru sidadaun Xinés hamutuk 25 atu mai Timor, maibé sira la konsege mai tanba ami hetan orientasaun hosi parte Imigrasaun katak, bandu sidadaun Xinés tama mai Timor Leste.
“Maibé iha domingo horseik ami simu fali orientasaun hosi parte Komandante Imigrasaun Aeroportu Díli, konaba bele simu pasajeiru hosi Xina mai Timor, maibé importante pasajeiru refere tenke iha karta mediku, konaba pasajeiru ho kondisaun diak”,afirma Branch Manager Sriwijaya Air.
Dirham Wahyudi subliña, iha segunda feira (ohin) ami simu fila-fali kontaktu hosi Komandante Imigrasaun Aeroportu katak, hahu segunda feira pasajeiru husi Xina labele tama ona mai Timor Leste.
“Ohin ami iha pasajeiru hamutuk 17,ne’ebé sira nia prosesu cheking aviaun Sriwijaya sc 270 rota Denpasar mai Dili remata ona no sira iha ona sala espera, maibé tanba simu fali orientasaun katak, pasajeiru Xinés labele tama mai Timor Leste, hau kontaktu kedas ba Sriwijawa Denpasar, nune’e pasajeiru 17 hosi Xina evakua sai fali hosi sala espera no la konsege mai Díli”.Fel
