Traballadór sira iha Kompañia Perisos husu deskulpa ba públiku no na’in ba kompañia, relasiona ho ameasa no deside sei hapara servisu durante Estadu Emerjénsia.
Lia hirak ne’e, Portavoz Traballadór Merito da Costa Belo, hato’o liu husi konferensia ba imprensa, ne’ebé hala’o iha Fatuhada-Díli, Kinta semana ne’e,(16/04/2020).
Portavoz Traballadór Kompañia Perisos, Merito da Costa Belo hateten, razaun husu pedidu deskulpa ba públiku tomak inklui mós na’in ba kompañia refere, tanba hasai liu tiha ona deklarasaun ne’ebé, iha tendénsia abandona servisu, iha situasaun Estadu Emerjénsia.
Tanba ne’e, Merito hateten, traballador iha empreza ne’e desidi dada hikas sira nia liafuan, hodi hala’o nafatin sira nia atividade ho responsabilidade, hanesan bai-bain, tanba nasaun no povu infrenta hela pandemia COVID-19.
“Pedidu deskulpa ba kompañia Perisos liu-liu ba senhor diretór da kompañia Perisos ami hato’o deskulpa tanba dezentendimentu ne’ebé mak halo iha perisos, ne’e hanesan asidente ida ne’ebé mak ami labele kontrola, ne’ebé ami haraik-an ami respeitu nafatin ami nia patraun, ami nia diretór da kompañia, hato’o deskulpa ami hakarak restaura fila-fali no hadia fila fali informasaun ne’ebé mak akontese iha loron Tersa, (14/04)”, deklara, Portavoz Traballador Kompañia Perisos, Merito da Costa Belo.
Iha fatin hanesan, Jestor Kompañia Perisos, Leo Ribeiro, hateten, kona-ba dezentendimentu ne’e, kompañia deside sei fó sansaun ba traballador hirak ne’e durante loron tolu, hafoin kontinua hikas sira nia serbisu hanesan bai-bain.
“Fó deit scor loron tolu ba sira ida ne’e atu hadia de’it para nune’e sira bele sadar oituan fali iha uma depois mai fali serbisu hanesan bai-bain, ami hakarak deklara ba públiku, informasaun ne’ebé mak fó sai iha loron (14/04) ne’e la los”, haktuir, Jestor Kompañia Perisos, Leo Ribeiro.
Asaun Traballador sira ameasa atu hapara sira nia serbisu durante iha situasaun Estadu Emerjénsia ne’e, hala’o iha loron, Tersa (14/04) foin lalais ne’e.
Total Traballadór Timor-oan ne’ebé servisu iha Armazen Kompañia Perisos hamutuk 50 resin.Ina
