Adjuntu Governador Banku Central Timor-Leste (BCTL), Venancio Alves Maria, hatete, BCTL transfere ona osan sosa asaun ConocoPhillips no Shell nian ho montante millaun USD 650.
Venancio haktuir, BCTL halo transferénsia ne’e, hanesan investimentu ida iha Timor-Gap.
“Kona ba transferénsia sosa asoens, tanba serbisu ne’e husi parte tolu, kompostu husi Ministériu Finansas, BCTL no Timor Gap, husi serbisu tolu ne’e, parte Banku Central, agora dadaun estabelese ona akordu entre sira. Hau fiar katak, sira to’o ona konkluzaun no transfere osan iha semana ida ne’e nia laran, tuir mekanismu serbisu ne’ebé estabelese, Banku Central sei transfere uluk montante ne’e ba iha Timor Gap, depois mak Timor Gap prosesa transferénsia ba iha ConocoPhillips ho Shell”, informa Venancio Alves Maria ba Jornalista sira iha edifísiu BCTL Akait Díli, Kinta (02/05).
Venancio esplika, modelu halo transferénsia ne’e, Banku Central mak jere fundu minarai no hanesan jestór operasional, no hetan ona instrusaun husi Ministériu Finansas atu bele transfere ona osan ne’e tuir regras ne’ebé BCTL aplika.
“Hanesan ita hotu hatene, osan minarai ne’e rai iha Banku Federal Estadus Unidus Amerika, entaun Banku Central sei komunika hodi hateten katak, halo transferénsia osan ho montante ne’ebé iha”, relata Venancio.
Antes ne’e,Governu fó koñesimentu ona ba Parlamentu Nasional, tanba kumpri kritéria sosa asaun husi kompañia petrolífera rua ne’e, hafoin Timor-Leste ne’ebé reprezenta husi Kay Rala Xanana Gusmão, asina akordu ho kompañia Shell hodi sosa nia asaun ho montante 26% resin, iha Bali Indonesia
Timor-Leste liu husi Timor Gap, antes ne’e asina ona akordu ho kompañia pertolifera ConocoPhillips ho Shell ho 56%, nune’e Timor-Leste iha ona asoens hamutuk 56% iha kampu Greater Sunrise.Ito/aba
