Negosiante sira husu Governu atu kontrola folin mina-sona ne’ebé sa’e maka’as iha merkadu no supermerkadu sira.
Gabriel de Carvalho nu’udar negosiante hatete, folin mina-sona ne’ebé mak sa’e maka’as ne’e impaktu husi krize mundiál, maibé nia husu Governu atu kontrola nafatin kompañia distribuidór sira.
“Ami-nia hakarak mak ne’e loja ne’e Governu tenke kontrola tanba folin ne’e hanesan hotu, la’os iha balun sa’e balun tun tuir sira-nia hakarak deit, ne’e mak ami preokupa, ami komprende katak afeta mundiál, folin sa’e la’os ita deit, nasaun hotu maibé folin tenke hanesan halo ami sente nasaun iha rua, tolu iha nasaun Timor-Leste ne’e,” dehan Gabriel de Carvalho, ba GMN, Kuarta (04/05).
Nia dehan, folin mina-sona ne’ebé dadaun ne’e mak litru lima nian sa’e ba USD 20, balun USD 18 no balun USD 17.
Impaktu seluk husi folin mina-sona sa’e, halo sira nia lúkru komesa menus, halo sira labele halo pagamentu kompleta ba saláriu traballadór nian, nune’e obrigatóriu tenke ko’a traballadór sira-nia osan ho porsentu 50.
Negosiante Maria Branca sente triste ho folin mina-sona ne’ebé sa’e maka’as iha merkadu, nune’e implika ba sira atu hapara atividade negósiu.
Observasaun GMN iha terrenu nota, loja distribuidór balun fa’an mina-sona litru lima ho folin USD 9.50 sentavu, no loja balun fa’an ho folin USD 11.75 sentavu.
Folin mina-sona iha supermerkadu W -Four Audian hatudu, mina litru 4.5 ho marka Perfeitu fa’an ho folin USD 11.75, mina ho marka Happy litru 2 folin USD 5.00, mina ho marka Kunci Mas Mililitru 485 ML, ho folin USD 1.25.
Antes ne’e mina-sona litru 5, kada kaixa ida fa’an ho folin USD 26.00 to’o USD 27.00, dadaun ne’e folin sa’e ba USD 40.00 to’o USD 50.00.Lau
