Atu rekopera ekonomia rai laran, Camara Comercio Industria Timor-Leste (CCI-TL), husu banku fó kreditu ba kliente sira ho funan ki’ik.
Relasiona ho COVID-19, ne’ebé sai pandemia ba nasaun barak iha mundu, inklui mós Timor-Leste, hodi afeta ba roda ekonomia rai laran, tanba ne’e, Camara Comercio Industria Timor-Leste (CCI-TL) husu banku fó kreditu ba konsumidor sira ho jurus ne’ebé ki’ik, nune’e bele rekopera roda ekonomia iha Timor-Leste.
“Rekoperasaun ekonómika, tanba ita agora husu kreditu fó kreditu, maibé ho jurus ne’ebé ki’ik se Governu tau kapitaliza iha banku sira ne’ebé mak iha Timor-Leste prinsipalmente BNCTL, BRI, Mandiri, ho BNU hatama iha ne’eba hanusa mak osan ida ne’e banku sira mak bele jere kontrola iha banku sentral ita ni’an bele fó jurus ne’ebé mak ki’ik, osan ne’e sei fila fali ami propoin 3 ou 5% máximu”, dehan, Prezidente CCI-TL, Oscar Lima ba GMN iha nia knar fatin Comoro, Domingu (21/06/2020).
Prezidente ne’e hatutan, empreza privadu hirak ne’ebé, halo atividade negósiu iha rai laran, kontribui mós ba kresimentu ekonomia Timor-Leste.
Tanba ne’e, Governu presija tau atensaun, hodi inseta osan, nune’e sirkulasaun orsamentu iha de’it rai laran, liu-liu ba populasaun sira, iha kapital no munisípiu.
Tuir Oscar Lima atu garantia, sirkulasaun osan iha de’it rai laran, Governu tenke brani fó projetu hirak ne’ebé mak iha, hodi fó oportunidade ba Timor-oan sira atu jere, maibé labele fó ba ema estranjeiru tanba la fó benefisiu ba ekonomia Timor-Leste.
Camara Comercio Industria Timor-Leste, iha esperansa ba Oitavu (VIII) Governu Konstituisional, atu labele tan xumba Orsamentu Jeral Estadu (OJE), tanba situasaun ne’e halo terus povu, ho razaun laiha orsamentu Estadu susar halo dezenvolvimentu ba Timor-Leste inklui mudansa ba povu nia moris di’ak. Ina
