Iha Sabadu loron (04/07/2020), Governu sei halo pagamentu subsídiu monetáriu USD 200 ba populasaun iha Rejiaun Administrativa Espesial Oe-Cusse Ambeno (RAEO-A).
Diretór Jerál Ministériu Solidaridade Sosiál no Inkluzaun, Rui Exposto informa, MSSI sei halo pagamentu subsídiu família, ba benefisiáriu sira, iha Rejiaun Administrativa Espesial Oe-Cusse Ambeno, iha loron 4 fulan jullu, no sei termina iha loron 13 fulan Jullu.
Ho ida ne’e, Diretór Jerál ne’e, fiar katak, pagamentu subsídiu família iha RAEO-A, sei termina tuir kalendáriu ne’ebé Governu desidi.
“Oe-cusse ita sei halo pagamentu iha dia 04 de Jullu 2020, aban ekipa MSSI komesa desloka ba Oe-Cusse para bele halo preparasaun ba iha prosesu pagamentu ami sei halo sosializasaun ba autoridade sira kona-ba subsídiu ne’e rasik no mós ami sei halo formasaun ba ekipa pagamentu ne’ebé autoridade Oe-Cusse prepara tiha ona ami tenke halo formasaun ba sira oinsa atu selu subsídiu ne’e rasik, ita tau kalendariu katak 10 dias pagamentu finaliza”,haktuir, Diretór Jerál Ministériu Solidaridade Sosiál no Inkluzaun, Rui Exposto ba GMN, Segunda (29/06/2020).
Montante orsamentu ne’ebé Governu aloka ba RAEO-A, besik tokon 4, entretantu tuir dadus ne’ebé mak ministériu solidaridade sosial no inkluzaun simu, total benefisiáriu husi rejiaun administrativa Oe-Cusse besik rihun rua nulu no benefisiáriu sira ne’e kompostu husi suku 18 iha Oe-Cusse.Ina
