GMN TV Economia Jorge Serrano: Empreza hasoru dezafiu iha situasaun polítika no pandemia COVID-19

Jorge Serrano: Empreza hasoru dezafiu iha situasaun polítika no pandemia COVID-19

21 views

Prezidente Konsellu Administrasaun Grupo Média Nacional (GMN), SA, Jorge Manuel de Araújo Serrano hatete, iha situasaun polítika rai-laran no pandemia COVID-19 ne’ebé foin liu ba,  GMN mós hanesan empreza sira seluk  enfrenta difikuldade no dezafiu sira,  maibé hanesan emprezáriu buka jere situasaun ho kuidadu.

Tuir Jorge Serano, difikuldade sira ne’e la hamate vontade atu kontinua dezenvolve GMN.

“Ha’u hanoin situasaun ekonomia iha rai-laran no mos globál depois de pandemia ne’e ita hotu hatene ona, ita koalia liu kestaun problema iha ita-nia rai-laran, ita mai husi krize polítika balun depois mai tan ho pandemia ne’e, laos situasaun normal probema la’ós afeta deit ba ita hotu, maibe ba maluk sira hotu, no haree mos ba vida diária nian. GMN mos hanesan empreza sira seluk iha difikuldade, iha dezafiu, maibe hanesan emprezáriu buka jere situasaun ne’e ho kuidadu tebes.

GMN ne’e hamrik besik tinan 20 ona so radio, televizaun foin hakat ba quintu aniversáriu ida ne’e prosesu ida, maibe situasaun ita bele hatete katak foin dadaun iha situasaun pandemia ne’e, ita mos halo tiha redusaun atividade balun iha GMN laran, até funsionáriu balun ita haruka hela iha uma, balun servisu ho saláriu metade deit, ita haree tuir ba nesesidade parte redasaun parte informasaun ita buka nafatin, maibé parte administrasaun, produsaun buat barak ita hatún, hau hanoin empreza hot-hotu buka atu ajusta sira nia kondisaun iha situasaun pandemia ne’e nia laran. Ne’ebé ha’u hanoin ida ne’e, fila-fali kona ba jestaun la’os iha ha’u maibe ha’u nia maluk sira seluk mos hatene halo ida ne’e,”dehan Jorge Serrano, bainhira partisipa iha programa Grande Entrevista Segunda (14-06-2022).

Nia esplika,  koalia kona-ba situasaun ekonomia, hanesan média dezafiu boot, tanba iha TL seidauk abituadu atu uza média liu-liu ba iha promosaun ba produtu sira, tanba iha Timor seidauk iha indústria ne’ebé boot.

“Ne’ebé ohin loron ita bele hatete katak, dezde GMN moris mai tinan lima ita iha parseiru balun, anunsiante sira, sira tau atensaun sira sente katak, importánsia GMN nian, tanba ne’e maka ha’u hanoin konfiansa ne’e boot liu tan,” nia esplika.

Tuir Jorge Serrano, hanesan emprezáriu, nia hanoin maluk sira mos hatene bainhira estabelese negósiu ruma tenke hanoin kedas konsekuensia saida maka mosu.

“Ita halo investimentu tenke rezerva ona fundu ne’ebé sufisiente para ita haree-tok, ita-nia target ne’e, iha tinan hira, ne’ebé ida ne’e ita koalia kona ba jestaun, ita koalia kona ba estratejia emprezariu ida nian, ne’ebé ha’u hanoin sustentabilidade ne’e la’o hanesan ne’e. Tanba ne’e maka ohin loron grasa maromak nian ita bele eziste, no bele moris, maibe mos konfiansa públiku nian, ita-nia  publisidade husi  instituisaun barak, ita-nia Governu rasik, ita mos opta ba halo kobertura komersiál, buat sira ne’e hotu forma ida oinsa GMN ne’e bele kontinua  iha sustentabilidade,”tenik Jorge Serrano.

Na’in ba GMN ne’e hatutan, atu harii GMN ne’e mai husi tinan 2003 bainhira lansa Semanário iha ne’eba estatutu hatete kedas katak,  iha futuru tenke iha televizaun no radio.

“Prosesu ne’e kleur, ita estuda haree merkadu, haree mos possibilidade ka lae, iha oportunidade ruma ka lae, ne’ebé ha’u hanoin iha sustentabilidade ida ne’e, parte jestaun ita buka oinsa maka ita tenke konsistente tanba ita loke média ida la’os ita loke restaurante ida,  ohin loke, aban taka, ita koalia ona servisu fo informasaun ba públiku ita tenke konsisténsia, ba konsekuensia saida deit,”nia hatutan.

Ekonomista Helder Lopes hatete, iha tinan lima ikus ne’e Timor-Leste nia ekonomia sofre, tanba ne’e,  liga ho GMN nia ezisténsia,  GMN bele sobrevive iha resesaun ekonómika iha tinan tolu nia laran.

“ Iha tinan lima ikus ne’e ita ekonomia sofre ba dala tolu 2017, 2018, no 2020, iha 2021 konforme dadus prelimináriu husi Ministériu Finansa hatete dehan ita-nia ekonomia rekupera ba 1.5% mais ida bainhira ita liga fali ba GMN ninia ezisténsia, GMN bele sobrevive iha resesaun ekonómika iha tinan tolu nia laran,”tenik Helder.

Tuir Helder Lopes, kompañia sira presiza tau atensaun katak, ho krize mundiál agora iha previzaun katak, mundu ne’e dala ruma monu ba resesaun ekonómika, entaun bainhira  mundu monu ba resesaun ekonómika nia implikasaun sei mai to’o iha TL.

“Husi ne’e, nu’udar empreza tenke prepara-an bainhira ita hasoru fali resesaun ekonómika ruma ka implikasaun husi resesaun ekonómika mundiál. Ho esperiénsia ne’ebé que GMN iha, ha’u hanoin preparadu ba hasoru ida ne’e, ita mos espera katak, ita-nia empreza seluk ne’e mos prepara-an hasoru situasaun sira hanesan ne’e, kuandu ita monu ba resesaun ekonómika,”nia afirma.eni


Banner

Foto

Notisia Ikus

PN pede às autoridades sanitárias que inspecionam carne vendida nas bermas das estradas

July 1, 2022
O deputado da bancada da Frente Revolucionário ...

Inflasaun Global halo TL lakon retornu investimentu FP biliaun USD 1.6

July 1, 2022
Ministru Finansan, Rui Agusto Gomes hateten, dur...

Xanana husu nasaun hotu atu proteje Oceano ho baze iha siénsia no inovasaun

June 30, 2022
Líder Nasionál Kay Rala Xanana Gusmão, husu b...

SEFOPE sei hamenus númeru dezempregu iha rai-laran

June 29, 2022
Sekretaria Estadu Formasaun Profísional no Empr...

AJAR apresia TR deside Projetu-Lei Responsabilidade PR inkonstitusionál

June 29, 2022
Diretór ezekutivu Asia Justice And Right (AJAR)...
1 2 3 742

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker