GMN TV Economia LH: Mina-rai iha Bayu Undan maran, povu mak sei terus liu

LH: Mina-rai iha Bayu Undan maran, povu mak sei terus liu

1,507 views

Peskizadór La’o Hamutuk (LH), Celestino Pereira Gusmão, hateten, povu ki’ik sira ne’ebé laiha kbi’it sei terus liu no hetan implikasaun maka’as, bainhira mosu situasaun difísil iha tinan 10 mai, tanba produsaun mina-rai iha posu Bayu Undan sei remata no desmantela iha fulan Outubru, tinan 2022 ne’e, no úniku Fundu Petrolíferu ne’ebé Estadu Timor-Leste depende ba sei termina mós iha tinan sanulu mai.

Tanba ne’e, sosiedade sivíl ne’e husu Governu atu kansela hotu projetu bo’ot sira hanesan Projetu Tasi-Mane no Aeroportu sira ne’ebé nia retornu sei iha duvida no la serteza, hodi konsentra ba setór produtivu, atu salva povu ki’ik sira hosi situasaun difísil ne’ebé atu akontese iha tinan 10 mai.

La’o Hamutuk observa katak, Timor-Leste ukun-an tinan 20 ona, maibe to’o agora laiha reseitas alternativu ne’ebé bele sustenta mákina Estadu, bainhira fundu petrolíferu ne’e remata iha tinan sanulu mai.

Peskizadór ne’e afirma, polítiku sira iha Timor-Leste hatene nanis kona-bá petrolíferu la’ós enerjia renovavel, nune’e to’o nia tempu sei maran, maibe polítiku sira ne’ebé ukun troka malu, kuaze la fó importánsia ba área produtivu sira ne’ebé sai alternativa ba fundu petrolíferu ne’e.

“Kansela projetu bo’ot sira ne’ebé nia retornu iha dúvida laran, dezeña fali ita-nia dalan ne’ebé bele ajuda atu harii ekonomia doméstika, liu-liu bele ajuda oinsa mak bele harii reziliénsia populár, atu ita-nia povu bele kbi’it hodi halo produsaun ai-han ba sira-nia moris, bele iha bee atu konsumu no mós bele investe maka’as iha setór edukasaun, saúde nune’e bele rezulta rekursu umanu ne’ebé iha kbi’it hodi reprodus fali atividade ekonómiku ida ne’ebé orientadu iha produtivu no sustentavel liu. Bayu Undan ne’e posu úniku ne’ebé iha dezenvolvimentu, posu bo’ot ne’ebé fó liu $23 billioens ba TL, to’o agora ita gasta tiha mais ou menus $13 billioens, ne’ebé utiliza ba despeza Estadu nian no ita mós hetan retornu balun, mais ou menus billiaun $8 hosi osan ne’ebé konverte hosi mina no gas ne’ebé ita investe iha merkadu finanseiru internasionais.

La’os notísia foun katak Bayu Undan atu hotu, Bayu Undan hanesan posu ida ne’ebé prevee tiha ona katak, iha tinan sira 2022 to’o 2024, maibe agora lais liu, maske ita-nia revizaun  ne’e atu hotu iha 2023 to’o 2024. Agora dadaun la’ós La’o Hamutuk de’it mak ko’alia, maibe autoridade sira ne’ebé promove mina no gas rasik mak ko’alia katak, to’o iha fulan Outubru tinan ne’e 2022, la’os mina ne’e maran de’it, maibe desmantela mós, atu hasai ona ekipamentu sira hotu ne’ebé iha Bayu Undan nian, depois sira sei diskute katak fatin ne’eba sira sei uza ba CCS, mas ne’e diskusaun ketak, maibe ne’e la’os buat ne’ebé foun atu halo ita hakfodak, tanba mina no gas ne’e rekursu ne’ebé la renovavel, bele oinsa mós nia bele hotu iha tempu ida, maske ita nia polítiku sira dehan mina ne’e la maran, ne’e laloos, no reseitas doméstika no reseitas seluk ita kuaze laiha.”afirma peskizadór ne’e, hafoin partisipa iha konferénsia ANPM nian iha City 8 Manleuana, Kinta (16/06/2022).

Celestino hateten, Governu tenke servisu maka’as no esforsu máximu liu, hodi prepara-an atu responde ba situasaun tuir mai.

“Tinan ne’e iha notísia bo’ot 2 ba ita, ida Bayu Undan atu hotu, ida seluk fundu petrolíferu ne’e mós sei hotu iha 2034, ne’e Ministériu Finansas rasik mak fó sai ona. Entaun problema ita nia atu responde ba ida ne’e, Ministeriu Finansas la opsaun ka medida sira ne’ebé prevê ita nia vida fundu petrolíferu nia vida utíl ne’e ba oin, no la fó dezeña planu estratéjiku ida ne’ebé bele harí investimentu iha ita nia rain, maibe kontinua fali ho projetu bo’ot sira ne’ebé ninia retornu ne’e sei iha dúvidas laran. Ida ne’e perigu liu, atu ita nia fundu petrolíferu ne’e mós hotu lais liu, duke previzaun sira. Enerjia minerais no gas ne’e, nia iha fatores lubuk ne’ebé mak bele halo ba oin ou bele ba kotuk, tanba primeiru kona-bá finansiamentu, se loos mak atu investe iha setores sira ne’ebé envolve risku bo’ot no presiza mós skill bo’ot no benefisiu bo’ot.”tenik Celestino.

Reseitas domestika ne’ebé Timor-Leste iha kada tinan rekolla de’it tokon $200  ne’ebé lakonsege atu responde ba nessesidade mákina Estadu, nein kategoria ida hosi kategoria orsamental 4 ne’ebé kada tinan Timor-Leste aprova liuhosi Parlamentu Nasional.

Enkuantu saláriu vensimentu de’it atinje ona tokon $24 maibe reseitas rai-laran ne’e konsege hetan de’it tokon $20 kada tinan.

Nune’e Estadu Timor-Leste kontinua dependente  ba fundu petrolíferu ne’ebé ameasadu atu hotu iha tinan sanulu mai.

Durante tinan 20 ukun rasik-an, konsege gasta ona osan hosi fundu petrolíferu kuaze billiaun $13 nune’e dadaun ne’e, hela de’it kuaze billiaun $19.Say

 

 


Banner

Foto

Notisia Ikus

PN pede às autoridades sanitárias que inspecionam carne vendida nas bermas das estradas

July 1, 2022
O deputado da bancada da Frente Revolucionário ...

Inflasaun Global halo TL lakon retornu investimentu FP biliaun USD 1.6

July 1, 2022
Ministru Finansan, Rui Agusto Gomes hateten, dur...

Xanana husu nasaun hotu atu proteje Oceano ho baze iha siénsia no inovasaun

June 30, 2022
Líder Nasionál Kay Rala Xanana Gusmão, husu b...

SEFOPE sei hamenus númeru dezempregu iha rai-laran

June 29, 2022
Sekretaria Estadu Formasaun Profísional no Empr...

AJAR apresia TR deside Projetu-Lei Responsabilidade PR inkonstitusionál

June 29, 2022
Diretór ezekutivu Asia Justice And Right (AJAR)...
1 2 3 742

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker