Autoridade Nasionál Petróleu no Minerais (ANPM) hamutuk ho kompañia mármore sira kontinua halo sosializasaun ba komunidade munisípiu Manatutu, molok hahú peskiza ba rekursu mármore.
ANPM hamutuk ho kompañia mármore sira hanesan Elegant Marmer Group (EMG) no Uma Marble Timor (UMT) kontinua halo sosializasaun ba komunidade munisípiu Manatuto, molok hahú peskiza ba rekursu mármore.
Vise Prezidente Asuntu Rekursu Minerais, José Gonçalves, relata, iha kompañia rua asina ona akordu ho Governu iha fulan Fevereiru no fulan Marsu, tinan ne’e, atu halo peskiza hodi determina kualidade no kuantidade rekursu mármore iha munisípiu Manatutu postu Laklo, suku Uma Kaduak.
“Atividade ne’e hanesan komprimisu empreza ni’an molok tama ba terenu ou peskiza, ANPM fasilita hodi hetan suporta husi komuniade lokál sira, tuir kontratu peskiza halo husi fulan 12 to’o fulan 18 no sei iha servisu 2 boot mak atividade tékniku ni’an hodi identifika no iha programa importante mak atu haree mós hanesan merkadu, para atu hatene katak bainhira produz ita presiza ba komersiál ou lae”, Vise Prezidente Asuntu Rekursu Minerais ne’e ba jornalista sira iha aldeia Ilimanu, munisípiu Manatutu, Kuarta (29-07-2020).
Tuir Ofisiál Relasaun Públika EMG, Noel Bernardo de Carvalho, konsidera ida ne’e prosesu naruk no EMG hetan desizaun husi ANPM sei foti amostra foun no haruka ba rai-liur, hodi halo estudu kona-bá kualidade fatuk marmore para bele tama ba prosesu explorasaun.
Eis Prezidente Repúblika (PR), José Ramos Horta, husu ba komunidade atu koopera ho Governu no investidór sira, liu husi prepara-an hodi kontribui ba dezenvolve marmore iha Timor-Leste, liu-liu iha munisípiu Manatutu.
“Populasaun tenke hatudu badinas no vontade atu estuda para hetan benefísiu hanesan motorista, enjineiru, IT, acounting no manager, Timor labele hein de’it hodi hili fatuk no dasa rai”, tenik nia.
Kompañia EMG sei responsabiliza ba área kuaze hektare 16.000, ho orsamentu ba investimentu iha faze peskiza hamutuk USD 800.000, ne’ebé sei hala’o durante fulan 18 nia laran.
Kompañia UMT ne’ebé lidera husi Timor-Oan ne’e sei hala’o peskiza no esplorasaun durante tinan 1, iha área parte norte postu Laklo ho rai hektare 400 no orsamentu ba investimentu iha faze peskiza hamutuk USD 700.000. ida
