Forum Organizasaun Naun Governamental Timor-Leste (FONGTIL), preokupa, Orsamentu Jerál Estadu (OJE) ba tinan 2020 ne’ebé governu propoin ho montante biliaun USD 1.4, ne’e sei la benefisia direta ba povu, enkuantu aplika ba Dotasaun Orsamentu Trimestrál (DOT) ba fulan Janeiru to’o Setembru, tinan 2020.
Tanba sistema Orsamentu ne’ebé iha tempu badak VIII Governu sei aprezenta ba Parlamentu Nasionál, la’os atu sustenta de’it ba fulan 3 de’it.
“Ninia benefisiariu ka atu haree orsamentu nia karakter investimentu ka lae ne’e sai kestaun, tanba DOT ne’e nia karakter atu responde de’it nesesidades bázikus, Orsamentu biliaun USD 1.4 ne’e, ita haree katak orsamentu ida ne’ebé la’os atu ezekuta ba fulan 3 de’it, ba Outubru, Novembru ho Dezembru lae”, diretór FONGTIL, Daniel dos Santos, hato’o asuntu ne’e ba jornalista sira, iha Tower Fatuhada, Sesta (04/072020).
Tanba ne’e nia dehan, orsamentu refere sei tustenta deit mákina Estadu,sei laiha benefisiu ba povu.
“Entaun orsamentu ba fulan Outubru, Novembru ho Dezembru ne’e sei sustenta de’it mákina Estadu, no sei la lori benefisiu direita ba ita nia povu nia moris, liu-liu atu hadi’a ekonómia povu nian, maibe ne’e gastus ita ne’ebé nesesita duni ba kondisaun ita nia mákina Estadu, maibe ita nia nafatin kestiona mak gastus ne’e nia karakter ne’e investimentu ka kalae, maibe kuandu aplika duni duodésimu ne’e, ne’e ita hatene katak sei la benefisia povu,”, hatete Diretor FONGTIL.
Nia dehan, OJE refere akumulasaun hosi gastus sira ne’ebé duodésimu hahú hosi Janeiru to’o Setembru, entaun orsamentu durante ne’e hanesan sustenta hela atividades COVID-19 no mós mákina Estadu nian ne’ebé funsiona hela, ne’eduni orsamentu ne’e akumulasaun de’it.
“Dalaruma ita ladun komprende sistema, ita hanoin orsamentu ida ne’e ba fulan tolu de’it mak ho montante biliaun USD 1.4 ne’e, maibe ne’e akumulasaun DOT hosi Janeiru to’o Setembru, entaun parese iha fulan Outubru ho Dezembru fahe DOT hosi kada fulan ne’e hira, nia sei hetan ida ne’e ba fulan tolu oin mai”, esplika Diretor FONGTIL.
Segunda-Feira loron 29 fulan Juñu tinan ne’e, VIII Governu Konstituional liuhosi konsellu ministru aprova ona proposta Orsamentu Jerál Estadu (OJE) ba tinan 2020 ho montante biliaun USD 1.4.
Tuir planu governu sei aprezensta proposta OJE 2020 refere ba Parlamentu Nasionál iha loron 15 fulan Setembru tinan ne’e, hodi diskute no aprova. Say
