Vise Ministra Finansas (MF), Sara Lobo Brites, hateten, Timor-Leste (TL) atu atinji vizaun ida katak, laiha ona ema kiak iha tinan 2030, tenke iha sustentabilidade ekonómika ba tempu naruk.
“Ha’u hakarak husu ba ita hotu tanba saída mak tenke iha sustentabilidade ekonómika iha TL no oinsa TL iha sustentabilidade ekonómika iha futuru. Ha’u nia hanoin pergunta ida uluk vizaun no objetivu polítika ekonómika no importánsia sustentabilidade ekonomia TL. Referénsia ne’ebé durante ne’e Governu uza hahú ukun-an to’o agora planu estratéjiku dezenvolvimentu no Governu aprezenta programa tinan lima (5) ne’ebé ho objetivu ba reforma ekonomia fiskál, atu nune’e TL iha ekonomia ne’ebé forte, inkluzivu no sustentabel, sai nasaun ne’ebé ho rendimentu nível altu iha tinan 2030. Ita hotu hatene sustentabilidade ekonómika hodi bele aségura mellora padraun moris sidadaun sira ni’an, atu atinji vizaun kona-bá laiha ona ema kiak iha tinan 2030, sidadaun moris saudavél tenke iha dezenvolvimentu ekonómiku sustentabilidade ba tempu naruk”, Visé MF ne’e liu husi ninia intervensaun iha Palácio Nobre, Lahane, Díli, Tersa (25-08-2020), bainhira sai oradór iha grande debate kona-bá sustentabilidade ekonómika iha rai-laran ne’ebé realiza husi Institutu Defeza Nasionál (IDN), hodi komemora aniversáriu IDN ba dala-10.
Governante ne’e hateten, durante ne’e Governu depende de’it ba fundu mina-rai, tanba ne’e atu garante ekonomia ba tempu naruk, Governu tenke uza fundu ne’e finansia fali sétór produtivu sira iha rai-laran, hodi garante sustentabilidade ekonómika iha TL.
“Ita koalia ekonomia ne’ebé sustentabél ekonomia ne’ebé tenke iha kresimentu ekonomia. Ita hotu akompañia ita-nia ekonomia iha rai-laran autór prinsipál mai husi Orsamentu Jerál Estadu (OJE), OJE rasik finansia por volta 85% mai husi fundu mina-rai ne’e hatudu preokupasaun mai ita katak fundu mina-rai fundu ne’ebé séi esgota iha tempu ruma, bainhira ita la utiliza fundu ne’e ho sustentabél atu bele finansia fali ita-nia área produtiva sira. Iha futuru ita iha situasaun ida mak bele iha problema iha sustentabilidade rasik“, haktuir Sara.
Ho nune’e OJE tinan-tinan Governu harii infraestrutura esénsiál hanesan estrada, ponte, eletrisidade no bee-moos, hodi transforma ekonomia ne’ebé depende ba sétór públiku, diversifika iha sétór produtivu sira.
“To’o ohin loron dezenvolvimentu séidauk inkluzivu, tanba foka liu ba infrestrutura no foka liu área ne’ebé tuir loloos Governu tenke tau matan, hodi hatudu katak osan ne’ebé foti husi fundu mina-rai bele konverte ekonomia ne’ebé bele hadi’a ita-nia maluk sira-nia moris, tanba ne’e Governu iha responsabilidade ba área barak“, tenik nia.
Oradór ba iha debate ne’e hanesan Avelino Coelho ho Sara Lobo Brites. Partisipa iha sémináriu ne’e mai husi membru Governu, sosiadade sivíl, inklui entidade sira séluk. ety
