Organizasaun Naun Governamentál La’o Hamutuk (LH), konsidera, ezekusaun Orsamentu Jeral Estadu (OJE) tinan 2021, ladun efetivu no la reflete kondisaun ekonomia sosiál povu nian.
Peskizadór LH, Elizaria Febe Gomez, hateten, ezekusaun OJE atinji ona %41.8, ho nia gastu Millaun USD 1,030,036,168.05, maibé maioria aloka ba sustenta mákina Estadu.
Tanba tuir peskizadór ne’e, iha Ministériu balun to’o agora ezekuta deit 13%, balun 15% husi orsamentu 2021 nian.
Nia hateten, lolos Governu prevé osan barak ba infraestrutura bázika, setór produtivu sira, nune’e bele hadia produsaun iha rai laran, no moris diak povu nian.
“Atu dehan deit katak, Lao Hamutuk rasik ami durante ne’e nu’udar sosiedade sivíl, ami sempre hateten katak númeru ezekusaun ne’ebé mak Governu publika iha portal transparénsia, ida ne’e la reflete ba kondisaun ekonomia sosial povu kiik sira nian,” hateten Elizaria Febe ba GMN, Tersa (03/08), iha nia knaar fatin, Bebora-Díli.
PN mos aprova ona OJE 2021 ho montante USD billaun 1.895, atu finánsia despeza Governu durante nian tinan 2021.
Maibé hafoin TL hasoru dezastre natural iha fulan Abríl liu-ba, PN halo kedas alterasaun lei OJE 2021 nian, hodi aprova fali Orsamentu Retifikativu (OR) ho montante millaun USD 223,8 ne’ebé aloka ba fundu kontijénsia, fundu infraestrutura no fundu COVID hodi responde ba kalamidade ne’ebé akontese.Eca
