Ministériu Solidaridade Sosiál no Inkluzaun (MSSI), sei halo pagamentu ba lista reklamasaun subsídiu famíliar hamutuk 15.774 ne’ebé sei realiza iha fulan ne’e.
Diretór Jerál Ministériu Solidariedade Sosiál no Inkluzasun (MSSI), Rui Exposto, informa, kestaun ne’e ba GMN, iha nia knar fatin Caicoli, Segunda ne’e (07/09), relasiona ho prosesu pagamentu ba lista reklamasaun subsídiu, dolar atus rua ba kada família, iha ámbitu COVID-19.
Pagamentu ne’e sei hala’o iha fulan ne’e nia laran ba benefisiáriu hamutuk 15.774.
Rui Exposto esplika, tuir lolo’os pagamentu ne’e hala’o ona iha fulan Agostu foin lalais, maibé la konsege realiza, tanba iha faillansu tékniku.
Diretór Jerál ne’e hatutan, MSSI halo ona análiza ba reklamasaun ne’ebé tama, konsege finaliza ona munisípiu ualu no hela munisípiu lima mak ekipa tékniku kontinua halo hela análiza.
“Agostu la konsege tanba, ita la’o ho sistema ida ke ita depende los liña internet kuandu liña internet lentu ona rede saida ona ita problema ona iha ne’eba ita komesa serbisu mós ita tenke hein entaun iha ne’e mak sai difikuldade ami ni’an atu bele aselera prosesu, maibé ha’u husu pasiensia oituan MSSI sei responde ba pagamentu reklamasaoens sira ne’ebé mak konsideradu elizivel para depois ita bele halo pagamentu, sim ita tenta iha fulan Setembru agora ita tama ita ona iha dia 07 ita espera katak nia bele remata iha dia 20 sira ne’e, tanba ita mós tenke rekoñese konsidera mós lista pagamentu iha kada suku 15 dias antes”, dehan, Diretór Jerál MSSI ne’e.
Rui Expostu apela ba komunidade ne’ebé ladauk simu subsídiu família atu pasiensia, tanba Governu sei halo pagamentu.
Kona-ba totál orsamentu ne’ebé mak sei selu ba uma ka’in, Diretór ne’e la sita montante, maibé tuir nia fundu ne’ebé atu fó apoiu laiha problema.
Rui Expostu informa númeru benefisáriu iha lista reklamasaun ne’e munisípiu Díli mak númeru bo’ot liu kompara ho munisípiu sira seluk.Ina
