Uma fukun Parlamentu Nasionál (PN) aprova ona Orsamentu Jerál Estadu (OJE) tinan 2020 iha faze jeneralidade ho votu a favor 44, kontra 0 no abstensaun 21.
Ho nune’e, hafoin aprova OJE tinan 2020 billiaun USD 1.4, Primeiru Ministru (PM), Taur Matan Ruak agradese ba deputadu sira iha PN, tanba orsamentu ba tinan 2020 refere konsege aprovadu iha PN.
“Governu manifesta esperansa boot finál hafoin aprezenta OJE ba datoluk OJE tinan 2020, tempu ida ne’e bele iha rezultadu di’ak ba ita-nia esforsu no kontribuisaun, hodi viabiliza OJE 2020, nune’e Governu promete iha diskusaun espesialidade ami hotu sei esforsu, hodi responde preokupasaun deputadu sira”, Xefe Governu ne’e hafoin OJE tinan 2020 pasa iha PN, Sesta (02-10-2020).
Xefe bankada FRETILIN, Francisco Miranda Branco, hatete, bankada FRETILIN louva VIII Governu Konstitusionál ne’ebé sustenta husi plataforma entendimentu PLP, KHUNTO ho FRETILIN, tanba liu husi diálogu permanente, sériu no responsabel bele hakotu impase polítiku, lori naroman no esperansa foun ba povu Timor-Leste.
“FRETILIN louva VIII Governu Konstitusionál, tanba maske ho de’it Dotasaun Orsamentu Temporária (DOT), maibé PM ho nia elenku governamentál konsege halo jestaun di’ak ba prevensaun no kombate virus COVID-19, hodi proteje ita-nia sidadaun tomak, to’o ohin loron laiha transmisaun lokál”, Xefe bankada FRETILIN ne’e.
Maske nune’e, bankada CNRT liu husi deklarasaun polítika, deputadu Patrocínio Fernandes, konsidera VIII Governu ne’ebé lidera husi PM, Taur Matan Ruak nia ezisténsia la tuir enkuadramentu legál.
“Tuir enkuadramentu legál katak ezisténsia VIII Governu ne’ebé moris husi violasaun Konstituisaun RDTL, iha ninia artigu 106, artigu 112, artigu 86 (f) no artigu 99, laiha lejitimidade konstitusionál atu aprezenta fali proposta OJE 2020, ka kualker OJE ba PN. Tuir konstituisaun RDTL, tuir artigu 86 alínea f, PN rasik mós tenke hetan ona disolusaun, husi loron 18, Marsu, tinan 2020, tuir prazu konstitusionál loron 60 kuandu la konsege aprova OJE. Bazeia ba regra konstitusionál bankada CNRT konsidera VIII Governu ne’ebé Prezidente Repúblika mak hahoris, Governu de faktu ne’e laiha lejitimidade konstitusionál, tanba tuir prinsípiu Estadu Direitu Demokrátiku Governu ida-ne’e labele kontinua eziste”.
“Ezisténsia VIII Governu viola konstituisaun RDTL, VIII Governu mós viola Lei Orsamentu no Jestaun Finanseira, tuir artigu 30, kona-bá prazu Aprezentasaun OJE. Númeru 1 husi artigu 30 LOJF hateten, Governu aprezenta ba PN to’o loron 15, fulan Outubru, proposta lei orsamentu ba tinan finanseiru tuir mai. Ida-ne’e katak, prazu atu aprezenta OJE 2020 maka monu (mais tarde) iha loron 15, fulan Outubru, tinan 2019, maibé ita iha ona loron 2, fulan Outubru, tinan 2020 katak, LOJF la fó fatin ba VIII Governu de faktu inkonstitusionál ne’e atu aprezenta OJE mai iha PN”, tenik Patrocinio.
Entretantu tuir ajenda, PN sei kontinua debate OJE tinan 2020 faze espesialidade, iha loron 5, fulan Outubru ne’e. ety
