Parlamentu Nasionál (PN) kinta lejislatura simu ona proposta Orsamentu Jerál Estadu (OJE) ba tinan 2021, ho montante billiaun USD 1.895.
Proposta orsamentu ne’e entrega hosi Vise Ministra Finansas, Sara Lobo Brites, akompaña hosi Ministru Asuntu Parlamentár no Komunikasaun Sosiál, Francisco Jerónimo, ba Prezidente PN, Aniceto Guterres Lopes.
Hosi total proposta OJE 2021 billiaun USD 1.895, kompostu hosi saláriu no vensimentu tokon USD 239.26, bens servisu tokon USD 421.49, transferénsia públika tokon USD 669.91, kapitál menór tokon USD 61.14 no kapital dezenvolvimentu tokon USD 503.20.
Proposta OJE refere ho nia programa prioridade liu-liu setór produtivu no iha área infraestrutura, sei kontinua finansia projetu balun ne’ebé pendente, inklui instalasaun eletrisidade no estrada sira.
“Prioridade ba infraestrutura esensiais sira, depois iha mós kontinuasaun obra sira ne’ebé iha hela no balun ne’ebé mak presiza selu, infraestrutura esensiais, inklui estrada no mós aeroportu Nicolau Lobato no kontinuasaun obra sira seluk”, Sara Lobo ba jornalista sira hafoin entrega proposta OJE 2021 ba PN, Kinta (15/10/2020).
“Levantamentu hosi Fundu Petrolíferu (FP) hosi RSE USD 547.9 levantamentu asima RSE tokon USD 829.7, ho total USD 1.347.06, ne’e ba iha levantamentu reseita petrolífera. Ita foti mós saldo rezedénsia no saldo hosi ZEESM kuaze tokon USD 238.8, ne’e saldo tezouru ne’ebé mak finansia OJE 2021 tokon USD 150 no tokon USD 88.08 hanesan rezerva,” tenik tan.
Alénde ne’e, Prezidente PN, Aniceto Guterres, hateten, posibilidade semana oin sei baixa ba komisaun C ne’ebé trata asuntu finansa públika, hodi halo audénsia ho Governu tuir pedidu normal.
“Deputadu sira mak sei hola desizaun atu urjente ka normal ne’e tuir rejimentu, hosi Governu laiha pedidu urjénsia ruma, tanba ne’e sei la’o ho prosesu normal”, afirma Aniceto.
Meza sei halo leitura ba proposta ne’e, ho númeru sira bara-barak ne’e, depois asesór sira sei prepara nota tékniku atu haree admisibilidade atu baixa ba komisaun sira, maibé posivelmente Segunda lae Tersa, semana oin.
PM Taur: OJE OJE 2021 aloka ba setór importante
Governu entrega Orsamentu Jerál Estadu (OJE) tinan 2021 ho montante billiaun USD 1.895 ba Parlamentu Nasionál (PN) ne’e aloka ba setór importante sira hanesan iha edukasaun, saúde infraestrutura no selu-seluk tan.
“Ida seluk mak OJE 2021 ne’ebé prazu ohin atu entrega ba PN ohin mak loron entrega nian, tanba ne’e Governu halo hela esforsu buat hotu di’ak entrega iha PN, abanbainrua kuandu iha debate orsamentu ita boot sira sei hatene por menores kona-bá alokasaun orsamentu, mais ita halo esforsu para aloka ba área setór sira importante hanesan edukasaun, saúde, agrikultura, turizmu no área ekonómika sosiál no infraestrutura, dezenvolvimentu instituisionál ita tau hotu osan billiaun USD 1.895”, dehan Primeiru Ministru (PM), Taur Mátan Ruak, iha Palásiu Prezidente Nicolau Lobato, Bairro Píte-Díli, Kinta (15/10/2020).
Entretantu, OJE tinan 2020 ho montante billiaun USD 1.4 aprova ona iha PN ho votu a favor 43, kontra 21, abstensaun 1 no haruka ona ba Prezidente Repúblika (PR), hodi halo promulgasaun. say/ina
