Governu konstitusional daualu liu husi Ministrériu Transporte no Komunikasaun (MTK), sei tetu didiak polítika hodi la halo lufu-lafu atu dada fiu fibra ótika husi Atambua no Alor Indonesia mai Timor-Leste, tanba Governu sei análiza didiak nia vantajen ho desvantajen.
“Desizaun sei tetu hikas mega projetu ne’e, tanba Aliansa Mudansa ba Progresu (AMP) ho xefi Negosiador Prinsipal Delimitasaun Fronteira Maritima Kay Rala Xanana Gusmão liu husi konferensia deside atu muda polítika ne’e, maske mega projetu ne’e asina ona husi eis Primeiru Ministru, Mari Alkatiri, iha tempu VII Governu”,dehan Ministru Transporte no Komunikasaun, José Agustinho da Silva, ba jornalista hafoin partisipa iha workshop ne’ebé organiza husi Autoridade Nasional Komunikasaun (ANC/sigla Portugés) iha salaun enkontru MTK Kaikoli, Segunda (26/11/18).
Agustinho haktuir, fibra ótika hanesan rede internet ne’ebé lais liu iha mundu digital no ohin loron rede ne’e uza ona iha mundu tomak atu fasilita servisu Estadu, setor privadu no Públiku, nune’e mos fasilita ema ho rapidamente hanesan asesu ba satelit bainhira download asuntu ruma ho lalais liu.
“Entaun ema barak mak interese, nune’e antes implementa tenki iha desizaun koletivu hodi bele hare polítika dada fibra ótika ne’e, tanba iha kestaun barak ne’ebé tenki hare”,koalia Agustinho.
Antes ne’e, eis Primeiru Ministru, Mari Alkatiri, hatete, Governu investe ba fibra ótika atu aselera komunikasaun liu-liu bele hatún folin komunikasaun ho baratu liu tan ne’ebé tuir planu sei bele utiliza iha fulan 8 oin mai.
Akordu ne’e rasik hala’o ona iha loron 19, fulan Marsu, tinan 2018, husi eis Primeiru Ministru Mari Alkatiri iha Timor Plaza no iha kontratu ne’e Governu fo fiar ba kompañia Moratelindo Lda. ne’ebé sei dada husi Alor-Indonesia mai Timor-Leste no kompañia TELINDO Lda. sei dada husi Atambua-Indonesia.ety
