Aviaun Citilink ho Sriwijaya semo tarde iha Sabadu (16/11), tanba impaktu husi ahi mate iha Aeroportu Internasional Nicolau Lobato Comoro Díli.
Inspektur Imigrasaun, Ernesto Maia, informa, eletrisidade área balu iha kapital Díli nian, mate husi tuku 11:00 to’o 13:00 Otl,no iha Aeroportu Nicolau Lobato mós hetan impaktu husi situasaun ne’e, hodi impede atividade bai-bain Aeroportu nian.
“Ahi mate ne'e fó impaktu ba ami-nia servisu halo check in ba pasajeirus sira ne’ebé atu ba rai liur, ami uza lampra telemovel nian mak halo check in manuál, ne’eduni ohin aviaun tenke semo tarde latuir ona ninia aras semo. Ita preokupa tebes ho situasaun ida ne'e, tanba jeradór mós laiha atu responde ba emerjensia hanesan ne'e, tanba ne’e ba oin husu ba Governu atu tau jeradór ida iha fasilidade ne'e atu situasaun hanesan ne'e labele repete tan”, hatete Inspetur Komandante Imigrasaun zero-zero um Aeroportu, Ernesto Maia ba GMN iha Aeroportu Internasional Nicolau Lobato Comoro Díli.
Inspektur ne’e haktuir, oras bai-bain aviaun Citilink semo husi Díli ba Bali Indonézia iha tuku 13:20 Otl, maibé tanba insidente ne'e, tenke semo iha tuku 14:5 Otl,enkuantu Sriwijaya lolos semo iha tuku 14:35 Otl, maibé tenke semo fali iha tuku 15:30 Otl.
Entretantu, GMN tenta atu halo konfirmasaun ho Prezidente Autoridade Nasional Aviasaun Timor- Leste kona bá situasaun ne'e, maibé laiha fatin tanba fim de semana.abaA
