Medida rekuperasaun ekonómika ne’ebé Governu sei apoiu ba empreza no traballadór sira durante surtu COVID-19, Governu liu husi Institutu Nasionál Seguransa Sosiál (INSS) halo hela rejistu ba empreza sira, nune’e bele hetan apoiu husi Governu durante fulan haat, hahú husi fulan Novembru, Dezembru, tinan ne’e no fulan Janeiru no Fevereiru, tinan oin.
Apoiu ba empreza no traballadór sira ne’e Governu liu husi Ministériu Koordenadór Asuntu Ekonómiku no Ministériu Solidariedade Sosiál no Inkluzaun (MSSI), lansa ona iha fulan Outubru liu ba.
“Rejistu ne’e hahú dia 4 ba oin ne’ebé agora rejistu sira ne’e la’o hela, la’o iha munisípiu sira hotu atu benefísia ba kompañia sira ho ita-nia setór informal sira, ita-nia maluk sira ne’ebé halo servisu hanesan kondutór sira, fa’an sasan sira tenke ba rejistu, ne’ebé husu mós sira-nia kooperasaun atu mós programa ne’e bele abranja no bele inklui sira tenke ba rejistu iha fatin estabelesimentu ne’ebé iha ona, ita bele dehan kuandu rejistu ne’e barak ona ita haruka pagamentu ne’e prosesa dau-daun ona, ita bele rejistu la’o, ita bele haruka dadus ne’e ba MSSI liu husi INSS haruka ba Ministériu Finansas (MF) fundu COVID prosesu la’o la hein to’o fulan haat rejistu hotu mak selu la’e, kuandu barak prosesu ne’e haruka ba ne’e halo simultaneamente prosesu rejistu no prosesu pagamentu”, Ministru Koordenadór Asuntu Ekonómiku (MKAE), Joaquim Amaral iha Baucau, Sábadu (14/11/2020).
Tuir Governante ne’e, rekuperasaun ekonómika ba kompañia no traballadór ne’e Governu prevé USD tokon 42. Rezolusaun Governu númeru 28/2020 aprova husi Konsellu Ministru (KM), iha kuarta loron 19, fulan Agostu liu ba kona-bá medida kurtu prazu ba mitigasaun impaktu husi krize ekonomia, ho nune’e kria apoiu nesesáriu ba rekuperasaun ekonómika.
Apoiu ne’e, sei fó ba traballadór sira ne’ebé, servisu iha instituisaun privadu, maibé la inklui ba traballadór sira ne’ebé servisu iha instituisaun públiku.
Traballadór sira ne’ebé sei hetan apoiu ne’e bainhira rejista ona, iha INSS no tama ona iha sistema fiskál hanesan dispensa parsiál ba kontribuisaun kada fulan ba seguransa sosiál.
Apoiu ne’ebé Governu fó ba traballadór sira durante fulan haat sei ba direta konta bankária kada traballadór.
Dekretu lei númeru 28/2020 ba apoiu rekuperasaun ekonómika ba traballadór no empreza sira ne’e, Xefe Estadu promulga ona iha fulan Outubru liu ba. ina
