VIII Governu Konstitusionál liu hosi Sekretáriu Estadu Kooperativa (SEKoop), Elizário Ferreira, hatete, kooperativa ne’ebé partisipa iha programa sosa produtu lokál hodi distribui ba komunidade iha programa sesta bázika hamutuk 214, inklui kompañia lokal 20 resin.
“Kooperativa 214 mak partisipa iha kompra ida ne’e. Kompañia lokál foin 20 resin mak submete proposta ba SEKoop no sira sei servisu hamutuk ho kooperativa atu oferese produtu lokál ba ita nia komunidade sira”, Sekretáriu Estadu Kooperativa, ko’alia assuntu ne’e bainhira remata enkontru avaliasaun ba implementasaun programa sesta bázika entre Ministru Estadu Koordenador ba Asuntu Ekonómiku (MCAE) ho membru Governu implementadór sira iha Palásiu Governu, Kuarta (11/11/2020).
Nia dehan, implementador ba programa sesta básika mak hanesan Ministériu Administrasaun Estatal (MAE), Ministériu Turizmu, Komérsiu no Indústria (MTCI), Ministériu Agrikultura no Peskas (MAP), Sekretáriu Estadu Kooperativa (SECoop), Sekretáriu Estadu Ambiente (SEA), no Sentru Lojístika Nasionál (CLN).
Programa sesta bázika ne’e lansa ba dahuluk iha loron 23, Outubru iha suku Sabuli, postu administrativu Metinaro, Díli.
Programa ne’e destina ba membru agregadu família ida-idak sei hetan produtu ai-han lokál ho valór USD 25 iha munisípiu, no iha Dili sei hetan voucher ne’ebé bele troka ho sasan iha loja ne’ebé koresponde ba valor osan USD 25 durante fulan-rua nia laran.
Total kustu ba implementasaun progarama nee hamutuk millaun USD 71,5 ho objetivu atu fó apoiu ba nesesidade bázika família, kombate hamlaha ba família vulnerável no apoiu ba agrikultór, produtór no komersiante lokál. fns
