Sekretáriu Estadu Kooperativa (SEKoop), Elizário Ferreira, hatete, valor produtu lokal iha sesta bázika sei atinji USD 25 no dalaruma la atinji to’o valor ida ne’e, tanba haree ba presu real produtu lokál iha merkadu.
“Agora iha lei hatete até USD 25 ba ema ida iha fulan ida. Até USD 25, la signifika katak tenke USD25. Maibé sé kompara ho produtu sira ne’e konta ho presu real iha merkadu, sasan sira ne’ebe distribui ne’e liu tiha fali presu”, SEKoop ko’alia asuntu ne’e bainhira remata enkontru avaliasaun ba implementasaun programa sesta bázika entre Ministru Estadu Koordenadór ba Asuntu Ekonómiku (MKAE) ho membru Governu implementadór sira iha Palásiu Governu, Kuarta (11/11/2020).
Sekretáriu Estadu ne’e afirma, programa sesta bázika ne’e hanesan solusaun ida ba rekuperasaun ekonómika. Tanba ne’e valor husi produtu hirak ne’e, ki’ik ka boot povu simu direta.
“Ha’u ema kooperativista distribui saída mak kooperativa nian, no benifísiu ne’e normalmente iha krize dalan atu rezolve krize. Agora ne’e mak krize COVID-19, solusaun ida mak rekuperasaun ekonómika. Agora COVID-19 ne’e rezolve ho povu. Ida agora ne’e atu USD 20 ka USD 15 de’it mós povu simu direta”, Elizário esplika.
Programa ne’e destina ba membru agregadu família ida-idak, sei hetan produtu ai-han lokál ho valór USD 25 iha munisípiu, enkuantu iha Díli sei hetan voucher ne’ebé bele troka ho sasan iha loja ne’ebé koresponde ba valor osan USD 25 durante fulan-rua nia-laran.
Total kustu ba implementasaun programa ne’e hamutuk millaun USD 71,5 ho objetivu atu fó apoiu ba nesesidade bázika família, kombate hamlaha ba família vulnerável no apoiu ba agrikultór, produtór no komersiante lokál.
Entretantu, Governu implementa ona programa sesta bázika iha munisípiu Díli, Bobonaro no Covalima. fns
