GMN TV Economia EE Laiha Ona, CCI-TL Rekomenda Governu Investe Iha Setór Importante Haat

EE Laiha Ona, CCI-TL Rekomenda Governu Investe Iha Setór Importante Haat

103 views

Hafoin Timor-Leste livre ona husi Estadu Emerjénsia (EE) Kámara Komérsiu Indústria Timor-Leste (CCI-TL-sígla portugés) husu ba Governu tenke investe maka’as setór importante haat, hodi rekupera fali ekonomia nasaun nian, tanba nasaun enfrenta pandemia COVID-19 hahú iha fulan marsu, tinan 2020 to’o Novembru tinan ne’e, iha ne’ebé impaktu ba ekonomia rai-laran tama iha resesaun no infraestrutura barak paradu.

Setór importante haat ne’ebé CCI-TL rekomenda mak hanesan, infraestrutura bázika, agrikultura, turizmu no edukasaun. Tuir Prezidente CCI-TL, Oscar Lima, setór infraestrutura mak bele fó servisu ba sidadaun sira hodi servisu. No Governu tenke investe maka’as iha setór agrikultura, tanba setór ne’e nu’udar aliserse ba ekonomia nasaun nian, nune’e mós setór turízmu.

Nia hatete tan, pandemia COVID-19 impaktu mós ba setór Edukasaun, tanba durante TL aplika Estadu Emerjénsia (EE) hodi hatúr medida rua hanesan Konfinamentu Obrigatóriu (KO) no Serka Sanitária (SS), atividade aprendizajen hotu suspende, no aplika deit eskola ba uma.

“Área ida mak agrikultura, área ida mak Komérsiu, área ida mak infraestrutura ne’ebé mak seidauk halo, iha estrada barak teb-tebes mak seidauk halo hotu. Ida mós hanesan, ita tenke haree ba ita-nia oan sira nia eskola, área edukasaun mós área ida importante tebes labele husik nia atu paradu,” hatete Prezidente CCI-TL, Oscar Lima, ba GMN, iha nia knaar fatin iha Díli, Sábadu (27/11).

Eis Prezidente Repúblika José Ramos Horta afirma, Governu mós tenke sosa produtu lokál agrikultór nian, no fó insentivu ba agrikultór sira, tanba hafoin nasaun enfrenta pandemia COVID-19, difikulta tebes agrikultór sira lori sira nia produtu ba iha merkadu.

“Ita tenke buka hatene, oinsá duni apoia pequena agrikultura, agrikultura ki’ik sira ne’e, barak iha foho, fó hahán ba sira, ba aldeia oinsá fó apoiu ba sira, apoiu liu hosi fasilita sirkulasaun de bens merkadoria sira nian, husi Same, Suai, Lospalos, Baucau sira ne’e mai Díli ne’e difikuldade boot ida, portantu ne’e bolu polítika de transporte e komersializasaun” kata Horta.

Parte Sosiedade Sivíl mós durante sempre hato’o rekomendasaun ba Governu atu tau prioridade ba setór produtivu sira, hanesan agrikultura no peska, turízmu, edukasaun no setór sosiál sira seluk. Tanba tinan-tinan iha alokasaun orsamentu tinan fiskal nian sempre ki’ik liu, aloka ba setór produtivu sira.

“Setór sosiál sira hotu bee, saneamentu, edukasaun, saúde sira hotu-hotu hamutuk 17 porsentu deit, ne’e tuir relatóriu sosiedade sivíl nian” dehan Diretór Ezekutivu FONGTIL, Daniel dos Santos Carmo.

Tuir relatóriu ne’ebé GMN asesa husi Organizasaun Naun Governamentál La’o Hamutuk (LH) hatudu, iha alokasaun Orsamentu Jerál Estadu (OJE) hahú husi tinan 2020 nian OJE billaun USD 1,497, aloka ba setór agrikultura iha porsentu 0.7, bee no sanitasaun 0.6 porsentu no edukasaun porsentu 7, nu’udar setór ne’ebé sai prioridade Governu nian.

Iha fali OJE 2021 billiaun USD 1,895 aloka ba setór produtivu no prioridade Governu nian mak hanesan, agrikultura porsentu 2.2, edukasaun porsentu 10, saúde porsentu 6, bee no saneamentu porsentu 0.7 deit.

No iha fali OJE 2022 nian husi orsamentu real billiaun USD 1,675 no nia alokasaun ba prioridade Governu nian mak hanesan, agrikultura porsentu 1.9, bee no saneamentu porsentu 1.9, edukasaun porsentu 9, no saúde hetan deit porsentu 5.

Relatóriu peskiza husi Banku Mundiál fó sai katak, revizaun despeza públiku no kresimentu ekonómika Timor-Leste la’o neineik liu. No nasaun ne’e nia taxa despeza públiku a’as liu iha mundu ho porsentu 90 husi Produtu Internu Bruto (PIB).

No Banku Mundiál mós rekomenda ba Governu TL tenke investe maka’as iha setór produtivu sira, nune’e bele hametin kresimentu ekonomia rai-laran.

Antes ne’e, relatóriu ne’ebé fó sai husi Fundu Monetáriu Internasionál (FMI) hatudu, husi nasaun hamutuk 11 iha sudueste asiátiku, iha tinan 2021, klasifikasaun PIB TL nian mak ki’ik liu kompara ho nasaun 10 seluk.

Klasifikasaun PIB ne’e TL nian rihun $ 3,119, Myanmar $ 4,830, Cambodia $ 4,929, Laos $ 8,519, Filipina $ 9,061, Vietnam $ 11,678, Indonézia $ 12,882, Tailándia $ 19,003, Malázia $ 29,340, Brunei $ 64,405 no Singapura $ 102,741.

Banku Central Timor-Leste (BCTL) mós fó sai katak, TL nia kresimentu ekonomia iha tinan 2020, tun ba negativu porsentu 6, ne’ebé kauza husi gastu orsamentu Estadu no impaktu mós husi pandemia COVID-19.Ina


Banner

Foto

Notisia Ikus

Governu adia dikusaun ba pedidu reforma Lere Anan Timur

January 20, 2022
Reuniaun Konsellu Ministru (KM) iha Palásiu Gov...

La atende kontaktu deputadu nian, PPN “hirus” MOP Salvador

January 20, 2022
[caption id="attachment_59069" align="aligncenter"...

CNE seidauk simu lista kandidatura PR

January 19, 2022
[caption id="attachment_59064" align="aligncenter"...

Eis Padre Martinho Gusmão deklara kandidata-an ba PR

January 19, 2022
Eis padre Martinho Germano da Silva Gusmão anú...

Ministru José Agustinho “ameasa” hasai funsionáriu APORTIL 24

January 19, 2022
[caption id="attachment_59043" align="aligncenter"...
1 2 3 683

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker