foto facebook AIFAESA
Diretor Operasaun Atividade, Autoridade Inspesaun no Fiskalizasaun Atividade Ekonómika Sanitária no Alimentár (AIFAESA), Gabriel da Costa, husu ba negosiante sira hanesan loja no atu labele koko fa’an aihan liu prazu ba komunidade, tanba bainhira AIFAESA hetan sei fó sansaun.
Gabriel da Costa haktuir, AIFAESA sei latolera operador ekonomia sira ne’ebé mak fa’an sasan liu prazu, tanba bele prejudika konsumedor nia saúde.
“Informasaun kona ba ema han paun depois mate ne’e, ami haree ona husi média imprimi no eletroniku balun, ami rekuñese katak, kuaje fulan hat ou lima ami labele halo inspesaun hodi haree sasan hirak ne’ebé mak liu prazu, tanba ami infrenta problema falta konbustivel, mas agora dadauk iha ona, nune’e ami nia ekipa tu’un dadauk ona ba terenu hodi halo konfirmasaun kona ba asuntu ida ne’e, hodi foti amostra no haree tuir fábrika ne’ebé mak durante ne’e distribui paun ba iha Merkado”, Hateten Gabriel da Costa, ba GMN iha nia servisu fatin Matadoru Dili, Tersa (18/12/2018),
AIFAESA afirma deklarasaun ne’e, relasiona ho akontesimentu ema mate, tanba han paun iha Munisípiu Lautem, Suku Vauro foin lalais ne’e, Inklui situasaun Natal no Tinan foun ne’ebé besik dadauk ona.
Gabriel da Costa haktuir, maioria paun ou roti tawar sira ne’ebé mak oras ne’e dadauk fa’an iha Merkadu ne’e, mai husi fábrika sira Cineza no bapa sira, ne’ebé tau iha plástiku, la’os Timor-oan sira mak halo.
“Tanba ne’e ami sei tama sai fábrika no loja sira hotu, hodi halo inspesaun ba nesesiedade báziku sira ne’ebé fa’an, tanba dala ruma balun prazu liu ona mós, sira sei kontinua fa’an nafatin, tanba mustahil operador ekonomia sira hakarak lakon,” katak Gabriel.
AIFAESA mós husu ba konsumedor sira atu bainhira sosa hahan, li-liu paun iha loja no dalan, tenki atensaun, tanba dala barak sasan sira ne’ebé mak fa’an iha kios no dalan ne’e, balun prazu liu ona, maibé ema kontinua fa’an tanba lakohi lakon osan.
“Normalmente operador ekonomia sira ne’e lakohi atu lakon, tanba ne’e mak komunidade sira ne’ebé mak hakarak sosa tenki kuidadu, no di’ak liu labele sosa iha dalan, maibé tenki sosa iha loja ne’ebé mak produs, atu nune’e garante nia kualidade”, afirma Gabriel,
Iha fatin hanesan, negosiante Manuel Constancio hateten, nu’udar negosiante hakarak manan osan, maibé la signifika hakarak hamate ema seluk.
“Paun ne’e ami simu husi Cineza sira, maibé ami mós haree nia prazu, kuandu sira lori mai loron rua tolu mak ema la sosa hotu, ami haruka sira foti fali, no sira mós hatene sempre mai haree tutuir”, katak Mauel.
Tuir planu, AIFAESA sei reativa fila fali aktividade inspesaun iha fatin hotu, hodi garante loja hotu labele fa’an aihan liu prazu iha tempu natal, hanesan nesesiedade báziku no seluk tan.ola
