Negosiante sira sente triste tanba ladun hetan rendimentu di’ak iha selebrasaun loron bo’ot natal tinan ida ne’e, tanba kompradór sira ladun sosa sasan ne’ebé sira fa’an iha estrada ninin.
Negosiante na’an João Bosco Diaz hato’o nia sentimentu tristeza ne’e wainhira hala’o hela atividade negósiu fa’an na’an iha dalan ninin iha área Comoro.
João hatete, tinan ida ne’e kompradór sira ladun sosa sasan hanesan tinan hirak liu ba nune’e sira ladun hetan rendimentu.
“kada tinan ami sempre fa’an sasan iha estrada ninin liu liu iha diresaun area komoro nian selebra loron bo’ot natal loron ne’ebé importante ba ema hotu hodi aproveita loron importante ida ne’e fa’an sasan bele hetan osan bele sustenta familia”,dehan nia.
Nune’e mós negosiante Jaimito Manuel Ximenes Soares hateten rendimentu ne’ebé sira hetan iha loron boot natal ho loron bailet laiha diferensa tanba kompradór sira menus sosa sasan.
“Ami fa’an na’an karau kilo grama ida fa’an $ 7.00 no lebra loron bo’ot natal mós nia folin hanesan ho loron bai bain ne’ebé maka ami fa’an tiha ona”nia afirma.
Iha dalan ninin kuaze Díli laran tomak hasoru loron boot natal no tinan foun komunidade fa’an produtu sira hanesan katupa nuu na’an no mós produtu oi-oin.
Loja balun iha Díli kontinua loke
Restaurante no Loja sira iha Kapital Díli maske balun taka maibé balun kontinua loke hodi atende konsumedór sira iha loron Natal.
Observasaun GMN iha loron rua nulu resin lima fulan ne’e iha Kapitál Díli nota katak atividade negósiu hanesan restorante no Loja sira maske balun taka maibé balun kontinua hala’o atividade hanesan bai-bain hodi buka rendimentu.
Negosiante sira hateten iha tempu loron natal tuir misa iha kalan natal nune’e iha loron sira hakarak kontinuahala’o atividade negósiu hodi atende konsumedór sira no buka rendimentu iha loron feriadu.
Maske nune’e rendimentu ne’ebé sira hetan iha loron feriadu ne’e ladun boot tanba komprador barak mak ba sosa sasan iha loja Cineza sira nian.
Alénde ne’e movimentu transporte iha Díli laran mós la hanesan loron baibain tanba ema aproveita loron feriadu ne’e balun hakmatek iha uma deit no balun ba pasa ferias hamutuk ho família sira iha tasi.
Nune’e observasaun GMN iha terrenu nota katak maske laiha movimentu transporte públiku ne’ebé maka’as maibé iha kareta ho xapa matríkula governu balun mós hala’o movimentu iha tempu feriadu.ety/aba
